बुटवल । रुपन्देहीको तिलोत्तमा नगरपालिकामा रहेको टाइगर प्यालेस रिसोर्टको क्यासिनो सञ्चालनको बाटो खुलेको छ । पाँचतारे होटल टाइगर प्यालेसमा रहेको क्यासिनोको सञ्चालनका लागि बाँकी तिर्नुपर्ने बक्यौता होटलले तिरेपछि क्यासिनो सञ्चालनको बाटो खुलेको हो ।
टाइगर प्यालेसमा क्यासिनो सञ्चालन गर्दै आएको एसएचएल म्यानेजमेन्ट सर्भिसेस प्रा.लि.ले २५ करोड ६० लाख रुपैयाँ बक्यौता बुझाएको हो ।
बक्यौता बुझाएसँगै टाइगर प्यालेसमा क्यासिनो सञ्चालनको बाटो खुलेको पर्यटन विभागका निर्देशक कालिबहादुर भुजेलले जानकारी दिनुभयो । निर्देशक भुजेलले भन्नुभयो–‘टाइगर प्यालेसको लागि २५ करोड ६० लाख बुझाएर नविकरण गर्नुभएको छ । हिजोको मिति (बुधबार) बाट उहाँहरुले नविकरण पत्र प्राप्त गर्नुभएको छ । अब क्यासिनो सञ्चालन गर्न सक्नुहुन्छ ।’
एसएसचलएल म्यानेजमेन्ट सर्भिसेज प्रा.लि.ले २०७७ ÷७८ देखि बक्यौता तिरेको थिएन । एसएचएल कम्पनि पनि आफूहरुले लिएको र कम्पनी मार्फत बक्यौता बुझाएको टाइगर प्यालेस रिसोर्टका अध्यक्ष बुद्धिसागर सुवेदीले जानकारी दिनुभयो । एसएचएल कम्पनीले काठमाडौँ सांग्रीला होटलमा समेत क्यासिनो सञ्चालन गर्दै आएको थियो । संग्रीलाको लागि २५ करोड ९० लाख रुपैयाँ बैंक ग्यारेण्टी बुझाएको पर्यटन विभागले जनाएको छ ।
बक्यौता बुझाएपछि टाइगर प्यालेसमा क्यासिनो सञ्चालन गर्ने बाटो खुलेको र अब छिट्टै क्यासिनो सञ्चालन गरिने टाइगर प्यालेसका अध्यक्ष बुद्धिसागर सुवेदीले बताउनुभयो । ‘फेबु्रअरी १४ देखि क्यासिनो पुन सञ्चालनको तयारी गरिरहेका छौं ।’ उहांले भन्नुभयो ।
टाइगर प्यालेस होटल विगतमा अष्ट्रेलियन कम्पनी सिल्भर हेरिटेज ग्रुपले चलाएको थियो । कोभिड लगायतका विभिन्न कारणले रिसोर्ट लामो समय संकटमा थियो । केही महिना टाइगर प्यालेसको स्वामित्व अमेरिकामा रहेका नेपालीहरुको कम्पनी हिमालयन टाइगर इन्भेष्टमेन्ट इंकले खरिद गरि सञ्चालन गरेको हो ।
