बुटवल । पाल्पा रिब्दिकोट १ ख्याहा रुपन्देही सम्र्पक समाजले आफ्नो दोस्रो साधारण सभा विभिन्न कार्यक्रम गरि मनाएको छ । विशेष गरि पाल्पाको रिब्दिकोट १ ख्याहामा जन्म भै विभिन्न कारणले रुपन्देहीमा बसोवास गर्नेहरुबीचमा सम्र्पक आदान प्रदान, भाईचाराको सम्बन्धलाई कायमै राख्ने र आईपरेका बेलामा समाजको तर्फवाट सहयोग आदान प्रदान गर्न सहज हुने हेतुले यस्ता समाज गठन हुने गरेका छन ।
समाजले आफ्नो स्थापना पछि विभिन्न सामाजिक उत्तरदायित्वका कामहरु गर्दै आएको छ । समाज जुन उद्देश्यले स्थापना भएको हो सोही अनुरुप अगाडी बढाउने र यस लाई राजनैतिक स्वार्थ भन्दा माथी उठेर सामाजिक काममा क्रियाशिल बनाउन प्रतिवद्ध रहेको समाजका अध्यक्ष जगदिश न्यौपानेले बताउनु भयो ।
समाजका संस्थापक अध्यक्ष तुल्सीराम पराजुलीले समाजको स्थापना ख्याहामा जन्म भै रुपन्देहीमा बसोवास गर्नेहरुका बीचमा दुःखसुख साटासाट गर्ने र सामाजिक काममा सहकार्य गरी अगाडी बढने हेतुले स्थापना भएकाले यसको मर्म अनुसार अगाडी बढाउन सुझाव दिनु भयो । संस्थापक अध्यक्ष पराजुलीले समाजमा राजनैतिक गन्ध आउन नदिन सबै एक भएर लाग्नु पर्नेमा जोड दिनुभयो ।
कार्यक्रममा प्रमुख अतिथि रिब्दिकोट १ ख्याहाका वडा अध्यक्ष चिरन्जिवी पोखरेलले आफनो जन्म स्थानलाई कसरी राम्रो बनाउने भन्ने विषय जुनसुकै स्थानमा बस्दा पनि सोच्नु पर्ने र आफ्नो जन्म स्थलको जग्गा जमिनलाई सुरक्षित रुपमा संरक्षण गर्न आग्रह गर्नु भयो । उहाँले भावनामा वगेर गरिएको विकासले गन्तब्यमा पुराउन नसकिने भएकाले साझा र सहमतिका आधारमा विकास निर्माणका कामलाई अगाडी बढाउन पर्नेमा जोड दिनुभयो ।
समाजका वरिष्ठ उपाध्यक्ष बसन्त पराजुलीले स्वागत गर्नु भएको कार्यक्रममा सललाहकार तथा मार्ग निर्देशक मेघराज न्यौपानेले समाजले गरेका कामको वारेमा प्रकाश पार्नु भएको थियो । त्यस्तै समाजलाई विभिन्न क्षेत्रवाट सहयोग गर्नेहरुलाई सम्मान गरिएको सल्लाहकार युवराज पराजुलीले बताउनु भयो ।
