बुटवल । ‘किवानिज क्लब अफ रुपन्देही लुम्बिनी’ले विद्यार्थीहरुलाई न्यानो पोशाक तथा शैक्षिक सामाग्री वितरण गरेको छ ।
बालबालिकाको क्षेत्रमा काम गर्दै आएको क्लबले बुधबार एक कार्यक्रमको आयोजना गरी रुपन्देहीको तिलोत्तमा १४ स्थित सरस्वती आधारभूत विद्यालयका १५० जना विद्यार्थीहरुलाई न्यानो पोशाक तथा शैक्षिक सामाग्री वितरण गरेको हो ।
विद्यार्थीहरुलाई न्यानो पोशाक तथा शैक्षिक सामाग्री वितरण गर्दै क्लबका अध्यक्ष मनोज आचार्यले अहिले जाडोयामको समय सुरु भएकाले स–साना विद्यार्थीहरुलाई चिसोबाट जोगिन सहज होस् भन्ने उद्देश्य र उनीहरुलाई पढाईप्रति हौसला प्रदान गर्नका लागि न्यानो पोशाक तथा शैक्षिक सामाग्री वितरण गरिएको बताउनु भयो । अध्यक्ष आचार्यका अनुसार सो विद्यालयमा शिशुदेखि कक्षा ७ सम्मका १५० विद्यार्थीलाई सो सामाग्री वितरण गरिएको हो ।
कार्यक्रममा तिलोत्तमा १४ का वडाध्यक्ष अस्विन पौडेलले क्लबले गरेको कामको प्रशंसा गर्दै आगामी दिनमा पनि निरन्तर रुपमा सामाजिक कार्यमा सक्रिय हुन आग्रह गर्नुभयो ।
विद्यालयकी प्रधानाध्यापक कमला गौतमले आफ्नो विद्यालयलाई रोजेर पोशाक र शैक्षिक साम्रागि प्रदान गरेकोमा क्लव र क्लबका पदाधिकारी र सदस्यहरुलाई धन्यवाद ज्ञापन गर्नुभयो ।
कार्यक्रममा क्लबका पूर्व अध्यक्ष सुरज पङ्गेनी, विद्यालय व्यवस्थापन समितिका अध्यक्ष दलबहादुर थापा ‘सजु’, विद्यार्थी कृष्ण केवट लगायतले भनाई राख्नुभएको थियो । कार्यक्रम क्लबका सचिब किशोर पङ्गेनीको संचालनमा भएको थियो ।
