बुटवल । लुम्बिनी एक्स्पो २०८०, अन्तर्राष्ट्रिय व्यापार मेलाको पाचौं दिन सोमवार उल्लेख्य दर्शकहरुले मेलाको अवलोकन गरेका छन् ।
‘स्वरोजगार आत्मनिर्भरता हाम्रो आधार, सहरदेखि गाउँसम्म व्यापार विस्तार’ भन्ने मूल नाराका साथ व्यापार प्रवद्र्धन र बजारीकरण गर्ने उद्देश्यका साथ रुपन्देही व्यापार संघले बुटवल मण्डपमा मेला सञ्चालन गरेको छ ।
सोमबार सार्वजनिक विदाको दिन परेका कारण मेला अवलोकनका लागि दर्शकहरु विहानै मेला स्थल पुगेका थिए ।
एक्स्पो मुल आयोजक समितिका सदस्य सचिव तथा रुपन्देही व्यापार संघका महासचिव दयानिधि भण्डारीका अनुसार सोमवार मात्र एकै दिन करिव ५० हजार दर्शकले प्रदर्शनी अवलोकन गरेका छन् । अवलोकनका लागि आएका दर्शकहरुले खाद्यान्न, कपडा, कस्मेटिक, साबुन, चिया तथा कृषि उत्पादनका स्टलहरुमा बढी चासो राखेका थिए । सोमवार मात्र करिव ३० लाखको आर्थिक कारोवार भएको अनुमान गरिएको छ ।
दर्शकहरुको आर्कषणको क्षेत्र प्रदर्शनीको मनोरञ्जनात्मक कार्यक्रम अन्तरगत सांस्कृतिक प्रस्तुति तथा प्रतियोगिताहरु रोचक बन्दै गएका छन् । सोमवार सांस्कृतिक कार्यक्रमतर्फ चर्चित लोकदोहोरी गायक खेम सेञ्चुरी, गायिका एवं प्रस्तोता मञ्जु पौडेल, बसन्त लम्साल, मञ्जु भट्टराई तथा हास्य कलाकार पुर्खे बाको प्रस्तुति रहेको थियो ।
दोहोरी गित प्रतियोगिता अन्तरगत राष्ट्रिय लोक तथा दोहोरी गित प्रतिष्ठान, लुम्बिनी प्रदेश र खस्यौली रोधि क्लब प्रा.लि. बुटवलका बीच प्रतिस्पर्धा भएको छ । डान्स आइडल २०८० अन्तरगत आइतवार उत्कृष्ट १० को प्रस्तुति रहेकोमा त्यसबाट सोमवार भोटिङको आधारमा एक जना बाहिरिएका छन् । यसैगरी मंगलवार सांस्कृतिक कार्यक्रम अन्तरगत चर्चित आधुनिक गायिका प्रिती आले आउने भएकि छन् ।
त्यसैगरि गायक विधान कार्की, गायीका रितु थापा, गायक रामप्रसाद पाण्डे र हास्य कलाकार टिकाराम साहित्यको प्रस्तुति रहने मेला सांस्कृत उपसमितिका संयोजक प्रकाश पौडेलले बताए । दोहोरी गीत प्रतियोगिता अन्तरगत प्रितम पोखरेल–शर्मिला विसी(काठमाडौं) र गोधुली रोधि साँझ, बुटवलका बीच प्रतिस्पर्धा हुने छ ।
