युनिभर्सल मेडिकल कलेज भैरहवामा विद्यार्थीको अनशन जारी : प्रिन्सिपलको राजीनामा माग

भैरहवा । रुपन्देहीको भैरहवा स्थित युनिभर्सल कलेज अफ मेडिकल साइन्स (युसिएमएस) एण्ड टिचिङ हस्पिटलमा अध्ययनरत विद्यार्थीहरुको अनशन जारी छ ।
१५ दिनदेखि अनसनमा बसेका विद्यार्थी आन्दोलनले अस्पतालमा पठनपाठन र उपचार सेवा पूर्णरुपमा बन्द भएको छ । कलेज प्रशासनले आन्दोलनरत विद्यार्थीका सबै माग सम्बोधन गर्न तयार रहेपनि आन्दोलनरत विद्यार्थीहरुले प्रिन्सिपलले राजीनामा नदिदासम्म आन्दोलन फिर्ता नलिने अडान लिएपछि सहमति जुट्न सकेको छैन ।
विद्यार्थीहरुले प्रिन्सिपल प्रा.डा. लक्ष्मी पाठकको राजीनामालाई पहिलो सर्त बनाएपछि सहमति जुट्न नसेकेको मेडिकल कलेजका जनसम्पर्क अधिकृत सुशील गुरुङले जानकारी गराउनु भयो ।
आवासीय चिकित्सकहरुले समेत विद्यार्थीहरुको आन्दोलनमा ऐक्यवद्धता जनाउँदै बिरामीको उपचार नगर्दा अस्पतालमा भर्ना भएका बिरामीहरु र उपचारका लागि आएका विरामीहरु उपचार सेवाबाट बञ्चित भएका छन् ।
प्रिन्सिपलमा नियुक्त भएर आएपछि डा. पाठकले एमबीबीएस तेस्रो, चौथो र पाँचौं वर्ष तथा इन्टर्नसिप गर्ने विद्यार्थीहरूका लागि नयाँ ड्रेसकोड लागू गरेकी थिइन् ।
विद्यार्थीहरूले उक्त ड्रेसकोड मान्य नहुने भन्दै विरोध जनाएका थिए । पाठकले सबै विद्यार्थीहरूका लागि पाइन्ट र सर्टको व्यवस्था गरेकी थिइन् । तर, महिला विद्यार्थीहरूले लामो समयसम्म पाइन्ट र सर्ट लगाएर इन्टर्न गर्न नसकिने भन्दै विरोध जनाएका थिए । त्यसरी विरोध जनाउने अन्तिम वर्षका विद्यार्थीहरूलाई परीक्षामा समेत रोक लगाएको विद्यार्थीहरूको आरोप छ ।
चौथो वर्ष एमबीबीएसमा अध्ययनरत छात्र छात्राहरूलाई मात्र एक वर्षको लागि लागू हुने गरी नयाँ ड्रेसको नियम लागू भएको हो । सुरूमा सामान्य जस्तै देखिएको यो विषय पछि गएर विद्यार्थीहरूले पाठकको नै राजीनामा माग्न थालेका छन् ।
प्रिन्सिपलले राजीनामा दिनुपर्ने, नयाँ ड्रेसकोड लागू नगरी पहिलेको जस्तै यथावत राख्नुपर्ने, इन्टर्नसिपको पारिश्रमिक बढाउनुपर्ने, परीक्षा दिन प्रतिबन्ध लगाएका विद्यार्थीहरूको प्रतिबन्ध फुकुवा गर्नुपर्ने लगायतका माग राखेर विद्यार्थीहरु आन्दोलनरत छन् ।
तर पछिल्लो समय प्रिन्सिपलको राजीनामालाई विद्यार्थीहरुले बटमलाइन बनाएका छन् । एमबीबीएस र बीडीएस अध्ययनरत करिब ६०० विद्यार्थीको आन्दोलनमा आवासीय चिकित्सकले समेत समर्थन जनाएका छन् ।