नवलपरासी । पश्चिम नवलपरासीमा जङ्गली च्याउ खाएर एकै परिवारका चार जना बालबालिका बिरामी परेका छन् । बर्दघाट नगरपालिका–१४ को आवास टोलमा बस्ने बर्मा लोहारका १३ वर्षीय छोरा किसन लोहार, छोरीहरु १५ वर्षीया अनुपमा, ११ वर्षकी आँचल र ९ वर्षकी अनु लोहार आज बिहान बिरामी भएका हुन् ।
च्याउ खाएर बिरामी परेका चारै जनाको शहिद स्मृति सामुदायिक अस्पताल चौपत्तामा उपचार भईरहेको र उनीहरुको अवस्था सामान्य रहेको जिल्ला प्रहरी कार्यालय नवलपरासीका प्रहरी नायव उपरीक्षक भोजराज पाण्डेयले जानकारी गराउनु भयो ।
जङ्गली च्याउ खाएर एकै परिवारका बालबालिका बिरामी भएको खबर प्राप्त हुनासाथ इलाका प्रहरी कार्यालय सेमरीबाट प्रहरी नायव निरीक्षक गोकर्ण चौहानको कमाण्डमा खटिएको टोलिले घटनाको अनुसन्धान गरिरहेको बताइएको छ । प्रहरीका अनुसार उनीहरुले कुन प्रजातिको च्याउ सेवन गरेका हुन भन्ने बारे खुल्न सकेको छैन ।
