रोल्पा । रोल्पामा आज भएको बस दुर्घटनामा परी चार जनाको मृत्यु भएको छ । मृत्यु भएका चारै जनाको पहिचान खुलेको रोल्पा प्रहरीले जनाएको छ ।
प्रहरीका अनुसार मृत्यु हुनेहरूमा रोल्पा परिवर्तन गाउँपालिका–३ का ४६ वर्षीय भक्त विक, माडी गाउँपालिका–२ का २२ वर्षीय प्रकाश वाठा, माडी गाउँपालिका–४ का ५१ वर्षीय गोर्खे डाँगी र ५० वर्षीया हस्ता डाँगी रहेका छन् । मृत्यु हुने गोर्खे र हस्ता डाँगी श्रीमान श्रीमती रहेको प्रहरीले जनाएको छ ।
रोल्पाको पश्चिमी बागमारादेखि दाङको घोराही तर्फ जाँदै गरेको ना ५ ख २६१२ नम्बरको बस घोराही–थबाङ सहिदमार्ग खण्डको रिचीगाउँमा दुर्घटना भएको थियो । दुर्घटनामा १९ जना घाइते भएका र घाइतेमध्ये २ जनाको अवस्था गम्भीर रहेको छ ।
आज दिउँसो सवा १ वजे तिर त्रिवेणी गाउँपालिका–७ गैरीगाउँको रिचीगाउँ नजिकैको सडकबाट बस करिब १५० मिटर तल खसेको हो । घटनाबारे प्रहरीलाई स्थानीयले जानकारी गराएपछि जिल्लाबाट सुरक्षा टोली घटनास्थल पुगेको थियो ।
जिल्ला प्रहरी प्रमुख एवं प्रहरी नायब उपरीक्षक श्याम सारुमगरका अनुसार शवको पोष्टमार्टमका लागि मृतकका शव जिल्ला अस्पताल रेउघा ल्याइएको र घाइते सबैको उद्धार गरी दाङको घोराहीस्थित राप्ती विज्ञान प्रतिष्ठान अस्पताल पठाइएको छ ।
