नेपाली सेनालाई राजनीतिक रूपमा गिजोल्न हुंदैन : रविन्द्र मिश्र

बुटवल । राष्ट्रिय प्रजातन्त्र पार्टीका बरिष्ठ उपाध्यक्ष रविन्द्र मिश्रले नेपाली सेनालाई राजनीतिक रूपमा गिजोल्न नहुने बताउनुभएको छ ।
पार्टीको संगठन सुदृढीकरण अभियान कार्यक्रममा रूपन्देही आउनुभएका मिश्रले पत्रकारहरूसँग कुरा गर्दै अहिलेसम्म राजनीतिले नगिजोलिएको देशको एकमात्र संगठन नेपाली सेनालाई राजनीतिक रूपमा गिजोल्न नहुने बताउनु भएको हो ।
पछिल्लो समय नेपाली सेनाको संख्याबारे आएका अभिब्यक्ति नेपाली सेनालाई कमजोर बनाउने उद्देश्यबाट प्रेरित भएको त छैन भनी प्रश्न गर्नुभयो । राज्यको खर्च कटौती गर्ने थुप्रै उपाय भएको भन्दै उहांले खर्च घटाउन सेनाको संख्या घटाउनुपर्छ भन्ने तर्क उचित नभएको उल्लेख गर्नुभयो ।
बिदेशी सेनासगँ लड्नका लागि मात्रै सेनाको ब्यवस्था नगरिएको बताउंदै बरिष्ठ उपाध्यक्ष मिश्रले आन्तरिक सुरक्षाका लागि पनि सेना आवश्यक पर्ने धारणा राख्नुभयो ।
सेनाको आवश्यकता र औचित्यताबारे थप प्रष्ट पार्दै उहांले भन्नुभयो–‘तत्कालीन नेकपा माओवादीलाई सात दलले शान्ति प्रक्रियामा ल्याएको नभई नेपाली सेनाको कारबाहीले उनीहरूलाई शान्ति प्रक्रियामा आउन बाध्य पारेको हो । नेपालमा फेरि त्यस्तै खाले छापामार युद्व नहोला भन्ने के ग्यारेन्टी छ ?’
स्वतन्त्र र तटस्थ रहनुपर्ने नेपालको कर्मचारी प्रशासन राजनीतिले गिजोलिएको र पछिल्लो समय न्यायालय समेत राजनीतिले प्रभावित भएको भन्दै उहांले अहिलेसम्म राजनीतिले नगिजोलिएको राज्यको एकमात्र निकाय नेपाली सेनालाई अनावश्यक बहसमा ल्याउन नहुने बिचार ब्यक्त गर्नुभयो ।
ललिता निवास जग्गा प्रकरण, नक्कली भुटानी शरणार्थी प्रकरण लगायत ठूला भ्रष्टाचार काण्डहरूको छानबिन सतही मात्रै भएको भन्दै उहांले पछिल्लो सुन तस्करी प्रकरणमा पनि भरिया मात्रै पक्राउ परेको र त्यो छानबिन पनि जरैसम्म नपुग्ने दाबी गर्नुभयो । उहांले मुलुकको हितका लागि संबैधानिक राजसंस्था र हिन्दुराज्य घोषणा गर्नुपर्नेमा जोड दिनुभयो ।