बुटवल । लुम्बिनी प्राविधिक विश्वविद्यालय अन्तरगत बुटवलमा इन्जिनियरिङ कलेज सञ्चालनको तयारी सुरु भएको छ ।
लुम्बिनी प्राविधिक विश्वविद्यालय स्थापना भएको एक वर्षपछि लुम्बिनी प्रदेश सरकारले पढाइ शुरु गर्न विश्वविद्यालयको टोलीले शुक्रबार बुटवल उपमहानगरपालिकाका प्रमुख खेलराज पाण्डेयसहितको टोलीसँग छलफल गरेको हो ।
बिश्वबिद्यालयका उपकुलपति प्राध्यापक डा. विनोदप्रसाद ढकालले चालु शैक्षिक सत्रबाट अध्ययन आरम्भ गर्ने योजना अनुसार बुटवलमा आंगिक क्याम्पस सञ्चालनका लागि छलफल गरिएको जानकारी दिनुभयो ।
उपकुलपति ढकालका अनुसार चालू शैक्षिक सत्रबाट ‘बिटेक इन आईटी’,‘बिटेक सिएस एण्ड एआई’, ‘बिटेक इन आईटी इन्जिनियरिङ्’ लगायत पाँचवटा शैक्षिक कार्यक्रम सञ्चालन गरिने छ ।
उहांका अनुसार खजुराको केन्द्रीय क्याम्पसमा इन्जिनियरिङ र सूचना प्रविधि तथा रूपन्देहीमा कृषि, वन र पर्यटनसँग सम्बन्धित कार्यक्रम सञ्चालन हुने छन् । त्यसका लागि बुटवल उपमहानगरपालिकासँग छलफल गरिएको हो ।
बुटवलमा प्रदेशको विश्वविद्यालयले आंगिक कलेज सञ्चालनका लागि प्रस्ताव आएकाले त्यसैअनुसार सहकार्य गर्न बुटवल उपमहानगरपालिका तयार रहेको बुटवल उपमहानगरपालिकाका प्रमुख खेलराज पाण्डेयले बताउनुभयो । उहांले विश्वविद्यालयलाई आवश्यक संरचना तयार गर्न र अन्य सहकार्यका लागि सकारात्मक भूमिका निर्वाह गर्ने प्रतिवद्धता जनाउनु भयो ।
बुटवलमा प्रदेशकै सबैभन्दा ठूलो इन्जिनियरिङ कलेज स्थापनाको सम्भावनाबारे छलफल भएको बताउदै उहांले अटो इन्जिनियरिङ, कृषि, वन र टनेल इन्जिनियरिङ तथा पर्यटनका क्षेत्रमा अध्ययन गर्ने कलेज स्थापना गर्ने गरी प्रक्रिया अगाडि बढ्ने र आगामी वर्षदेखि केही विषयहरुको अध्ययन शुरु गर्ने गरी काम थाल्ने समझदारी भएको जानकारी गराउनु भयो ।
