दाङ । लुम्बिनी प्रदेश सरकारले प्रस्तुत गरेको बजेट प्रति असहमति जनाउदै प्रदेश सभा बैठक अवरुद्ध गर्दै आएको प्रमुख प्रतिपक्षी दल नेकपा (एमाले) र लुम्बिनी प्रदेश सरकारबीच सहमति भएको छ ।
बजेटको बिरोध गर्दै लगातार सदन अवरुद्ध गर्दै आएको प्रमुख प्रतिपक्षी दल एमालेले मंगलबार बसेको प्रदेशसभाको दोस्रो बैठकमा पनि विरोध जनाएको थियो । एमालेले लगातार बैठक बहिष्कार गरेपछि गएराति एमाले र सरकारबीच वार्ता भएको थियो ।
दुवै पक्षबीच राति भएको वार्तामा प्रमुख प्रतिपक्षी दल एमालेले उठाएका विषय मुख्यमन्त्री डिल्लीबहादुर चौधरीले प्रदेशसभामा सम्बोधन गर्ने र विपक्षीले पनि आजदेखि प्रदेशसभाको बैठक सञ्चालन गर्न दिने सहमति भएको नेकपा एमालेका प्रमुख सचेतक तुलसी चौधरीले जानकारी दिनुभयो ।
बैठक बहिष्कार गरेर बाहिरिएको एमालेसँग मुख्यमन्त्री चौधरी र सभामुख तुलाराम घर्तीले वार्ता गरेर सहमति जुटाउनुभएको हो । वार्तामा विपक्षी दलका नेता लीला गिरी, उपनेता चेतनारायण आचार्य र प्रमुख सचेतक चौधरी सहभागी हुनुभएको थियो ।
सत्तापक्ष र प्रमुख प्रतिपक्षबीच सहमति भएपछि मंगलबार स्थगित प्रदेशसभा बैठक आजका लागि बोलाइएको छ । प्रदेशसभा सचिव दुर्लभकुमार पुनमगरले मंगलबार स्थगित भएको प्रदेशसभाको दोस्रो अधिवेशनको १७ औँ बैठक आज दिउँसो १ः०० बजेका लागि बोलाइएको सूचना जारी गर्नुभएको छ ।
सभामुखको निर्देशनानुसार प्रदेशसभा नियमावलीको नियम १२ को उपनियम ३ बमोजिम बैठक बोलाइएको सूचनामा उल्लेख छ ।
