तिलोत्तमा । रुपन्देहीको तिलोत्तमामा २५ हजार दर्शक क्षमताको क्रिकेट रंगशाला बन्ने भएको छ । तिलोत्तमा नग।पालिका वडा नं.–१७ पूर्व दरखसवामा पौने ५ बिघा क्षेत्रफलमा निजी लगानीमा बन्ने रङ्गशालाको सोमबार शिलान्यास गरिएको छ ।
एक्स्ट्राटेक ओभल नामाकरण गरिएको रंगशालाको तिलोत्तमा नगरपालिकाका नगर प्रमुख रामकृष्ण खाँणले शिलान्यास गर्नुभएको हो । ९ वर्षदेखि अस्ट्रेलियामा सूचना प्रबिधि क्षेत्रको ब्यबसाय गर्दै आएका बिनोद कुँवर र सुदिच्क्षा गौतमको लगानीमा बन्ने रंगशाला पहिलो वर्ष ५ हजार दर्शक क्षमताको हुने र हरेक वर्ष ५ हजार क्षमता थप्दै ४ वर्षमा २५ हजार क्षमताको बनाउने लक्ष छ । यो क्रिकेट रंगशाला होस्टेल, एकेडेमी र तालिम केन्द्र सहितको हुने एक्स्ट्राटेक ओभल प्रालिका प्रबन्ध निर्देशक बिनोद कुंवरले बताउनुभयो । आफू क्रिकेटको पारखी भएकाले यो खेलको विकासमा निजी क्षेत्रबाट योगदान गर्ने उद्देश्यले रंगशालामा लगानी गरेको कुंवरले बताउनुभयो । यो निजि लगानीमा बन्ने नेपालको पहिलो ठूलो क्रिकेट रंगशाला हुनेछ ।
चार तलाको भवन सहितको रंगशालामा एकेडेमी र तालीम केन्द्र संचालनका लागि पूर्व राष्ट्रिय क्रिकेट खेलाडी शक्ति गौचनलाई जिम्मेवारी दिइएको एक्स्ट्राटेक ओभल प्रालिका चिफ अप्रेटिङ अफिसर सुदिक्षा गौतमले बताउनुभयो । एक वर्षमा क्रिकेट प्रतियोगिता सञ्चालन गर्न मिल्ने गरी रंगशालामा ८ सय ट्रक माटो हालेर जग्गा सम्माउने काम भैसकेको र रंगशाला चार वर्षमा पूरा हुने बिनोद कुंवरले बताउनुभयो ।
रंगशालाको शिलान्यास समारोहमा तिलोत्तमा नगरपालिकाका प्रमुख रामकृष्ण खाँणले रुपन्देही जिल्ला क्रिकेटको उर्बरभूमि भएको र अन्तर्राष्ट्रिय स्तरको सुविधासम्पन्न रंगशाला बनेपछि खेलाडी उत्पादन र प्रतियोगिता आयोजना मात्र नभई खेल पर्यटनमार्फत समग्र नगरको विकासमा योगदान पुग्ने बताउनुभयो । निजी क्षेत्रबाट लगानी भएपनि यो नगरकै गौरवको आयोजना हुने उहांले बताउनुभयो ।
कार्यक्रममा नेपाल क्रिकेट संघ क्यानका सचिव प्रशान्तविक्रम मल्ल,नेपाल ओलम्पिक कमिटीका केन्द्रीय सदस्य दिर्घबहादुर केसी लगायतले बोल्दै रंगशाला बनेपछि रुपन्देहीले क्रिकेटमा फड्को मार्ने उल्लेख गर्नुभयो ।
