संसार पोष्ट
बुटवल, १९ साउन । बुटवलमा आईतबार भएको पालिकास्तरिय सरसफाइ तथा खानेपानी उपभोक्ता संस्थाहरुको भेलाले खानेपानीमा बिद्युत प्राधिकरणले लिदै आएको डिमाण्ड चार्ज हटाउन माग गरेको छ ।
खानेपानी तथा सरसफाइ उपभोक्ता महासंघ रुपन्देहीका अध्यक्ष धुुर्बकुमार धितालको अध्यक्षतामा भएको भेलामा खानेपानी उपभोक्ता संस्थाका प्रतिनिधिहरुले विद्युत प्रयोग गरी खानेपानीमा तान्दा बिद्युत प्राधिकरणले लिने डिमान्ड चार्ज हटाउन माग गरेका हुन् ।
मानव तथा प्राणीका लागि अत्यावश्यक खानेपानी जमिनमुनीबाट बिद्युत प्रयोग गरी ताने बापत डिमान्ड चार्ज लिनु उपयुक्त नभएको भन्दै विद्युत प्राधिकरणले लिदै आएको डिमान्ड चार्ज शुल्क हटाउनुपर्नेमा उनीहरुले जोड दिएका छन् ।
कार्यक्रममा बोल्दै बुटवल उपमहानगरपालिकाका प्रमुख शिबराज सुबेदीले बढ्दो जनसंख्या बृद्धिसंगै खानेपानीको समस्या विकराल बन्दै गएको भन्दै यसको समाधानका लागि दीर्घकालिन योजना बनाएर नगरपालिका अगाडी बढ्ने बताउनु भयो । प्रमुख सुबेदीले खानेपानी संस्थान बुटवलले आफ्नो दायित्व निर्बाह गर्न नसकेका कारण खानेपानीको समस्या उत्पन्न भएको आरोप लगाउनु भयो ।
भेलामा खानेपानी उपभोक्ता संस्था शँकरनगर ड्राईभरटोलका अध्यक्ष केशवराज न्यौपानेले बुटवलमा खानेपानीको ल्याब स्थापना गर्न माग गर्नुभयो । कार्यक्रममा यमबहादुर पछाइ, साबित्रा रेग्मी, हितमान पुन लगायतले आआफ्ना भनाई राख्नुभएको थियो ।
