उपनिर्वाचन हुने बारा, चितवन र तनहुँमा ६९ जनाको उमेदवारी दर्ता

काठमाडौं । आगामी वैशाख १० गते हुने उपनिर्वाचनका लागि बारा, चितवन र तनहुँमा कुल ६९ जनाको उमेदवारी परेको छ । सोमबार भएको उमेदवारी मनोनयमा तीनै क्षेत्रमा गरी कुल ६९ जनाको उमेदवारी परेको निर्वाचन आयोगले जनाएको छ ।
निर्वाचन आयोगका जिल्ला निर्वाचन अधिकारीहरूका अनुसार बारा क्षेत्र नम्बर २ मा ३६, चितवन क्षेत्र नम्बर २ मा २४ र तनहुँ क्षेत्र नम्बर १ मा ९ जनाको उमेदवारी परेको छ ।
बारा–२ मा दलका १२ जना र स्वतन्त्र २४ जना गरी ३६ जनाको उमेदवारी परेको जिल्ला निर्वाचन कार्यालयले जनाएको छ । बारामा नेकपा (एमाले)बाट पुरुषोत्तम पौडेल, जनता समाजवादी पार्टीका अध्यक्ष उपेन्द्र यादव, जनमत पार्टीका शिवचन्द्र कुशवाह, राष्ट्रिय स्वतन्त्र पार्टीका रमेश खरेललगायतको उमेदवारी परेको छ ।
यसैगरी चितवन–२ मा दलका १२ र स्वतन्त्र १२ जना गरी २४ जनाको उमेदवारी परेको छ । नेपाली कांग्रेसबाट जीतनारायण श्रेष्ठ, नेकपा (एमाले)बाट रामप्रसाद न्यौपाने र राष्ट्रिय स्वतन्त्र पार्टीका सभापति रवि लामिछाने लगायतको उमेदवारी परेको छ ।
यस्तै तनहुँ–१ मा दलका ९ जनाको उमेदवारी परेको छ । जसमा नेपाली कांग्रेसबाट गोविन्द भट्टराई, नेकपा (एमाले) बाट सर्वेन्द्र खनाल, राष्ट्रिय प्रजातन्त्र पार्टीबाट शोभा गुरुङ, राष्ट्रिय स्वतन्त्र पार्टीबाट स्वर्णिम वाग्लेसहितको उमेदवारी परेको छ । निर्वाचन कार्यालयका अनुसार तनहुँमा स्वतन्त्र उमेदवारी परेको छैन ।