प्रधानमन्त्री प्रचण्डलाई विश्वासको मत प्राप्त : पक्षमा १७२ र पिक्षमा ८९ मत

काठमाडौं । प्रधानमन्त्री पुष्पकमल दाहाल प्रचण्डले प्रतिनिधिसभाबाट विश्वासको मत प्राप्त गर्नुभएको छ ।
सत्ता समीकरण फेरबदल भएपछि प्रधानमन्त्री प्रचण्डले आज(सोमबार) दोस्रोपटक विश्वासको मत लिनुभएको हो । विश्वासको मत दिन प्रधानमन्त्रीले राखेको प्रस्तावको पक्षमा १ सय ७२ र विपक्षमा ८९ मत परेको प्रतिनिधिसभाका सभामुख देवराज घिमिरेले घोषणा गर्नुभयो । सभामुख घिमिरेका अनुसार मत दिन्न अर्थात् तटस्थमा एक मत परेको छ । आजको संसद बैठकमा २ सय ६२ सांसद उपस्थित रहेका थिए ।
प्रधानमन्त्री प्रचण्डलाई नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी (जसपा), राष्ट्रिय स्वतन्त्र पार्टी (रास्वपा), लोकतान्त्रिक समाजवादी पार्टी (लोसपा), जनमत पार्टी, नागरिक उन्मुक्ति पार्टी र स्वतन्त्र सांसदहरुले साथ दिएका थिए ।
नेकपा (एमाले), राष्ट्रिय प्रजातन्त्र पार्टी (राप्रपा) र नेपाल मजदुर किसान पार्टीले प्रधानमन्त्रीको विपक्षमा मतदान गरेका थिए ।
गएको पुस १० गते प्रधानमन्त्रीमा नियुक्त हुनुभएका प्रचण्डले पुस २६ गते पहिलो पटक विश्वासको मत लिनुभएको थियो । त्यतिबेला प्रचण्डले २६८ सांसदको विश्वासको मत प्राप्त गर्नुभएको थियो ।
सरकार टिकाउन १ सय ३८ सांसदको मत आवश्यक पर्दछ । एमाले र राप्रपा सरकारबाट बाहिरिएपछि झण्डै एक महिनादेखि प्रधानमन्त्री प्रचण्डले १६ मन्त्रालय आफैंले सम्हालिरहनुभएको छ । विश्वासको मत लिएलगत्तै प्रधानमन्त्रीले सरकारलाई पूर्णता दिने बताउँदै आउनुभएको छ ।