बुटवल । बुटवल वहुमुखी क्याम्पसमा भएको स्वतन्त्र विद्यार्थी युनियन (स्ववियू)को निर्वाचनमा नेकपा एमाले निकट अनेरास्ववियुले प्यानल नै जितेको छ ।
अध्यक्ष पदमा अनेरास्ववियुका उम्मेदवार दुर्गा बहादुर एमसी विजयी भएका छन् । उनी निकटतम प्रतिस्पर्धी माओवादी निकट अखिल क्रान्तिकारीका शिव बहादुर खवासलाई करिब ५ सय बढी मतले पराजित गर्दै अध्यक्षमा विजयी भएका हुन् । निर्वाचनमा नेपाल बिद्यार्थी संघका सागर पौडेल तेस्रो भएका छन् ।
त्यसैगरी सचिव पदमा अनेरास्ववियुका उम्मेदवार निलकण्ठ पाण्डेय, कोषाध्यक्ष पदमा अनेरास्ववियुका शशांक बस्याल विजयी भएका छन् । यस्तै सदस्य पदमा पनि अनेरास्ववियुका नविन खनाल, सूचना भण्डारी, सुनिल कार्की, भुकम्प अर्याल, बिमल कुमार पासी, सागर एमसी र प्रज्वल बस्नेत फराकिलो मतान्तरले विजयी भएका छन् ।
बुटवल बहुमुखी क्याम्पसमा अनेरास्ववियुले ०४९ सालदेखि जित्दै आएको छ । यहाँ राष्ट्रिय स्वतन्त्र बिद्यार्थी समूहका बरन्यम राज गौतमको नेतृत्वमा एउटा प्यानल, अखिल नेपाल स्वतन्त्र बिद्यार्थी युनियनका क्रान्तिकारी बिप्लवका पदम पराजुलीको प्यानल र अखिल क्रान्तिकारी बहुमतका पारस राहादीको प्यानल गरी ६ वटा संगठनबीच प्रतिस्पर्धा भएको थियो ।
निर्वाचन समितिले अन्तिम नतिजा सार्वजनिक नगरेपनि अनेरास्ववियुको प्यानलले करिब ५ सयको अग्रतामा जितेको स्रोतले जनाएको छ । कुल ७ हजार ११० विद्यार्थी मतदाता रहेको क्याम्पसमा २ हजार ६ सय ८१ मत खसेको थियो ।
