ओमसतिया अध्यक्ष कप क्रिकेट–२०७९ : वडा नम्बर ५ को जित

भैरहवा । रुपन्देहीको ओमसतिया गाउँपालिकामा जारी अध्यक्ष कप क्रिकेट –२०७९ अन्तर्गत बिहीबार सम्पन्न भएको २ वटा खेलमा गाउँपालिकाका दुबै टिम पराजित भएका छन् ।
गाउँपालिका टिम र वडा नम्बर ५ को बिचमा भएको पहिलो खेलमा वडा नम्बर ५ले १० विकेटले जित निकालेको छ । टस जितेर गाउँपालिकाको टिमले ब्याटिङ्ग रोजेको थियो । गाउँपालिका बि का कुनै पनि खेलाडीले दोहोरो अंक बनाउन सकेनन् । उसका लागि शैलेन्द्र, शिवलाल र हेमन्तले समान ३÷३ रन जोड्दा पालिका टिमले ७ दशमलव १ ओभरमै अलआउट हुदै १९ रन मात्र बनाएको थियो ।
टिम बि लाई सस्तोमा समेट्ने क्रममा वडा नम्बर ५ का बिरु र दुर्गेशले समान ३÷३ विकेट बाडेका थिए । वडा नम्बर ५का दिनेशले २ विकेट लिए ।
२० रनको लक्ष्य सहित मैदान छिरेका वडा नम्बर ५ का ओपनर दुर्गेशले पहिलो ४ बलमै टिमलाई जित दिलाएका थिए । ४ बल खेलेका उनले २ छक्का र २ चौका सहित ४ बलमै लक्ष्य भेटाएका थिए । खेलमा वडा नम्बर ५ बाट ६ रन खर्चेर ३ विकेट लिएका बिरु म्यान अफ द म्याच घोषित भए ।
बिहिबार नै गाउँपालिका टिम ए र वडा नम्बर ६ बिच सम्पन्न भएको दोश्रो खेलमा वार्ड नम्बर ६, ५ विकेटले विजयी भएको छ ।
टस जितेर गाउँपालिका टिम ए ले ब्याटिङ्ग रोज्दै ८८ रन बनाएको थियो । उसको लागि मनोजले सर्वाधिक २१ रन बनाउदा सागरले १६ रन र दिनेशले १५ रनको ब्यक्तिगत योगदान दिएका थिए ।
बलिङ्ग तर्फ वडा नम्बर ६ का चन्द्र शेखरले ३ विकेट एवम मनोहर र राजकुमारले समान २÷२ विकेट लिएका थिए
८९ रनको बिजयी लक्ष्य सहित मैदान छिरेको वडा नम्बर ६ ले खेलको ११ ओभरमा लक्ष्य भेटाएको थियो । उसका लागि मनोहरले ५० रन बनाए भने कृष्णले १८ रन र बिकासले ९ रन बनाएका थिए ।
बलिङ्ग तर्फ गाउँपालिका टिम ए का मनोज र मान बहादुरले समान २÷२ विकेट लिएका थिए । खेलमा २ विकेट लिएर ५० रन बनाएका मनोहर म्यान अफ द म्याच घोषित भए ।
शुक्रबारको पहिलो खेल वडा नम्बर १ र वडा नम्बर ५ का बिच तथा दोश्रो खेल वडा नम्बर ३ र वडा नम्बर ६ का बिच हुने आयोजक द राईजिङ्ग क्लब अफ बर्दिहवाका राकेश गुप्ताले जानकारी गराउनु भयो ।
द राईजिङ्ग क्लब अफ बर्दिहवाको आयोजना तथा ओम सतिया गाउँपालिकाको सहयोगमा चैत १ गतेदेखि सञ्चालित क्रिकेट प्रतियोगिता चैत ९ गते सम्म सञ्चालन हुनेछ । गाउँपालिकाका ६ वटै वडाका टिम र गाउँपालिकाको दुई टिम गरि प्रतियोगितामा ८ टिम रहेका छन् । प्रतियोगिताको प्रथम पुरस्कार ६० हजार, द्वित्तीय पुरस्कार ३० हजार रहेको द राईजिङ्ग क्लब अफ बर्दिहवाका अध्यक्ष प्रविन गुप्ताले बताउनु भयो । यसको साथै प्रतियोगिताको म्यान अफ द म्याच, म्यान अफ द सिरिज, बेस्ट बलर, बेस्ट ब्याटर लगायतलाई पनि पुरस्कृत गरिने गुप्ताले जानकारी दिनुभयो ।