काठमाडौं । नवनिर्वाचित राष्ट्रपति रामचन्द्र पौडेलले पद तथा गोपनीयतको शपथ लिनुभएको छ । उहांले सोमबार मुलुकको तेस्रो राष्ट्रपतिका रूपमा शपथ लिनुभएको हो ।
पौडेललाई सर्वोच्च अदालतका कायममुकायम प्रधानन्यायाधीश हरिकृष्ण कार्कीले शपथ गराउनुभएको हो ।
काठमाडौंको महाराजगन्जस्थित राष्ट्रपति भवन शीतलनिवासमा आयोजना गरिएको शपथ ग्रहण कार्यक्रममा राष्ट्रपति पौडेलले शपथ लिँदा नेपाली सेनाले २१ तोपको सलामी अर्पण गरेको थियो । पौडेल अब पाँच वर्षका लागि शीतलनिवासमै बस्नुहुने छ ।
पौडेलको सपथ ग्रहण संगै निवर्तमान राष्ट्रपति विद्यादेवी भण्डारी आफ्नो दुई कार्यकाल पूरा गरी शीतलनिवासबाट बिदा हुनुभएको छ । शपथ ग्रहण समारोहमा उपराष्ट्रपति नन्दबहादुर पुन, प्रधानमन्त्री पुष्पकमल दाहाल प्रचण्डसहित मन्त्रिपरिषद् सदस्य, संघीय संसदका सदस्यसहित विशिष्ट व्यक्ति,संवैधानिक अंगका प्रमुख, कूटनीतिक नियोगका प्रतिनिधिको उपस्थिति थियो ।
निवर्तमान राष्ट्रपति भण्डारीलाई प्रधानमन्त्री पुष्पकमल दाहाल ‘प्रचण्ड’ले सरकारका तर्फबाट उपहार प्रदान गर्नुभयो ।
