सैनामैना । रुपन्देहीको सैनामैनामा कार र ट्रक एक आपसमा ठक्कर खाँदा चार जना घाइते भएका छन् । पूर्व पश्चिम राजमार्ग अन्र्तगत सालझण्डी र फायरलाईन विचको जङ्गलमा पश्चिमबाट पूर्व तर्फ आउँदै गरेको लु ३ च ८९२ नम्बरको ट्रकमा विहीबार विहान लु २ ख ४३० नम्बरको कार ठोक्किएको प्रहरीले जनाएको छ ।
प्रहरीका अनुसार कारमा नवविबाहित बेहुला बेहुली सवार रहेका थिए ।
दुर्घटनाबाट कारमा सवार बाँकेको राप्ती रोनारी गाउँपालिका–९ की २२ वर्षीया कविताकुमारी थारु, सोही ठाउँकी २३ वर्षीया शुशिला थारु, १५ वर्षीय विवश थारु र नवलपरासी पश्चिम सरावल गाउँपालिकाका २५ वर्षीय कृष्णा चौधरी घाइते भएको लुम्बिनी प्रदेश प्रहरी कार्यालय बुटवलले जनाएको छ । घाइते मध्ये कविताकुमारी थारुको अवस्था गम्भीर रहेको र अन्यको अवस्था सामान्य रहेको प्रहरीले जनाएको छ । घाइतेहरुको लुम्बिनी प्रादेशिक अस्पताल बुटवलमा उपचार भइरहेको छ ।
