बुटवल । विश्वासको मत नपाएपछि सुदूरपश्चिम प्रदेश सरकारका मुख्यमन्त्री राजेन्द्रसिंह रावलले पदबाट राजीनामा गरेका छन् । पुस २७ गते एमालेसहित ३ दलको समर्थनमा मुख्यमन्त्री नियुक्त भएका रावलले प्रदेश प्रमुख देवराज जोशीलाई भेटेर राजीनामा बुझाएका हुन् ।
मुख्यमन्त्री रावलले पेश गरेको विश्वासको मत लिने प्रस्ताव सुदूरपश्चिम प्रदेश सभामा अस्वीकृत भए पछि उनी स्वद पद मुक्त भएका हुन् । नागरिक उन्मुक्ति पार्टीको समेत समर्थनमा मुख्यमन्त्री नियुक्त भएका रावलले संविधान अनुसार ३० दिनभित्र विश्वासको मत लिनुपर्ने थियो ।
जस अनुसार रावल मुख्यमन्त्री भएको ३० दिन पूरा भएको आज विश्वासको मत लिने दिन नागरिक उन्मुक्ति पार्टीका सांसद प्रदेश सभामा अनुपस्थित भएपछि नेकपा एमालेका नेता रावलले विश्वासको मत पाउन नसकेका हुन् ।
रावल पदमुक्त भएपछि प्रदेश प्रमुख जोशीले नयाँ मुख्यमन्त्री नियुक्तिका लागि परामर्श थालेका छन् । संविधानको धारा १६८ (२) अनुसार नियुक्त मुख्यमन्त्रीले ३० दिन भित्र विश्वासको मत नपाएमा प्रदेश सभामा सबैभन्दा ठूलो दलको नेतालाई मुख्यमन्त्री नियुक्त गर्ने संवैधानिक व्यवस्था छ । संवैधानिक व्यवस्था अनुसार १९ सिट सहित प्रदेशसभामा ठूलो दल नेपाली कांग्रेस संसदिय दलका नेता कमलबहादुर शाह मुख्यमन्त्री नियुक्त हुन सक्नेछन् । उनले पनि ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ ।
