विपन्न, सुकम्बासी र उत्पीडित समुदायको  समस्या समाधान गर्छौ : पहाडी

सैनामैना । नेकपा माओवादी केन्द्रका नेता तथा रुपन्देही निर्वाचन क्षेत्र न. ५ (१) का गठबन्धनका साझा उम्मेद्वार विनोद पहाडीले विपन्न, सुकम्बासी र उत्पीडित समुदायको पक्षमा काम गर्ने प्रतिबद्धता जनाएका छन् ।
निर्वाचन क्षेत्र न. ५ को १ अन्तर्गतका विभिन्न क्षेत्रमा चुनावी भेटघाटका क्रममा उम्मेद्वार पहाडीले नागरिकले भोगेका दैनिक अप्ठ्याराहरुलाई समाधान गर्ने प्रतिबद्धता जनाएका हुन् । कञ्चन गाउँपालिका वडा न. १ लौसामा जागरण सृजनशिल आमा समूह र कञ्चन जागरण दलित सञ्जालले मंगलबार आयोजना गरेको अन्तरक्रिया कार्यक्रममा बोल्दै पहाडीले निर्वाचन क्षेत्रमा रहेका विपन्न, दलित तथा महिलाहरुलाई आत्मनिर्भर र सक्षम बनाउने कार्यक्रम लागु गर्ने बताए । उनले निर्वाचन क्षेत्रमा रहेका विपन्न र दलित तथा महिलाहरुको जीवनस्तर उकास्ने सवालमा गठबन्धनका तर्फबाट प्रतिनिधिसभाका उम्मेद्वार नेपाली कांग्रेसका नेता भरतकुमार शाह र आफू संवेदनशिल रहेको बताए ।
निर्वाचन क्षेत्रलाई खरको छानामुक्त, महिला तथा विपन्न समुदायका लागि घुम्ती स्वास्थ्य सेवा समेत सञ्चालन गर्ने पहाडीले घोषणा गरे । नेकपा माओवादी केन्द्रका केन्द्रीय सदस्य समेत रहेका पहाडीले अहिलेको गठबन्धन विपन्न र सिमान्तकृत नागरिकको अधिकार संरक्षणका लागि बनेको बताए । उनले विगतमा केन्द्रीय बजेट पारेर प्रतिनिधिसभाका उम्मेद्वार काँग्रेस नेता शाहले काम गरेको बताउँदै अब थप कामहरु हुने विश्वास दिलाए । उनले गठबन्धनका उम्मेद्वारलाई जिताएर पछुतो मान्ने अवस्था आउन नदिने बताए ।
कार्यक्रममा नेपाली काँग्रेस रुपन्देहीका उपसभापति डा. अनिता शाहले कञ्चन क्षेत्रमा अझै पनि भौतिक विकास गर्न बाँकी रहेको बताउँदै अब मानवीय विकासका लागि समेत गठबन्धनका उम्मेदवारहरुले काम गर्ने बताइन । शाहले गठबन्धनको स्थानीय सरकार बनिसकेको र अब संघ र प्रदेशमा समेत गठबन्धनको उम्मेदवार जिताएमा मात्रै दलित, महिला तथा सिमान्तकृत समुदायहरुको अधिकार स्थापित हुने बताईन ।
उक्त अवसरमा कञ्चन जागरण दलित सञ्जालका अध्यक्ष राजकुमार सुनार, सदस्य दिलमायाँ विक तथा कृष्ण ढुंगानाले बोल्दै स्थानीयहरुलाई रोजगारीसँगै विकास निर्माणमा जोड्न आग्रह गरेका थिए ।