बुटवल, २ कात्तिक । नेकपा एमालेले संचालन गरेको चुनावी प्रचार प्रसार कार्यक्रममा विभिन्न पार्टी परित्याग गरी १७६ जना एमाले प्रवेश गरेका छन् । बुटवल–११, हात्तीसुँढका अगुवा नेताहरुसहित एमाले प्रवेश गरेकाहरुलाई पार्टी उपाध्यक्ष विष्णु पौडेलले पार्टीमा स्वागत गर्नुभयो ।
नेकपा माओवादी केन्द्रका नेताद्वय राजु शाही र विशाल राना, नेकपा एकीकृत समाजवादी निकट महिला संघकी बुटवल नगर सचिव राधादेवी अधिकारी, जनता समाजवादी पार्टीका नेता सुनिल न्यौपाने, जसपा बुटवल–११ का वडासचिव प्रविनकुमार काफ्लेलगायत एमाले प्रवेश गरेका सो पार्टीले जनाएको छ ।
त्यस अवसरमा बोल्दै रुपन्देही २ मा प्रतिनिधिसभा उम्मेदवार एमाले उपाध्यक्ष पौडेलले विकास र समृद्धिको एजेण्डा बोक्ने पार्टी एमाले मात्रै भएकाले विवेक पु¥याएर मतदान गर्न आग्रह गर्नुभयो । नेता पौडेलले अधुरा आयोजना पूरा गर्न र रुपन्देहीलाई देशकै रोलमोडलको रुपमा विकास गर्नका लागि आफूले अगुवाई गर्ने बताउनुभयो ।
एमाले पोलिटब्यूरो सदस्य एवं रुपन्देही क्षेत्र नम्बर २ प्रदेशसभा १ का उम्मेदवार लिला गिरीले लुम्बिनी प्रदेशको मुहार फेर्नका लागि आफूले उम्मेदवारी दिएको भन्दै एमाले, जसपा र राप्रपाबीचको सहकार्यले आगामी चुनावमा सत्तरुढ गठबन्धन परास्त हुने बताउनुभयो ।
