आजदेखि ‘अस्थायी मतदाता’को नामावली संकलन सुरु

काठमाडौं, ६ असोज । निर्वाचन आयोगले आजदेखि प्रतिनिधि सभा, समानुपातिक निर्वाचनका लागि ‘अस्थायी मतदाता’को नामावली संकलन सुरु गर्ने भएको छ । सर्वोच्च अदालतको आदेश अनुसार आयोगले सरकारी कर्मचारी, सुरक्षाकर्मी र कैदीबन्दीलाई समानुपातिक निर्वाचनका लागि ‘अस्थायी मतदाता’को नाम संकलन गर्न थालेको हो ।
सर्वाेच्च अदालतले सरकारी कर्मचारी, सुरक्षाकर्मी र कैदीबन्दीलाई प्रतिनिधिसभा र प्रदेशसभा निर्वाचनमा मतदान गर्न पाउने व्यवस्था गर्न भनेको थियो । तर, आयोगले समानुपातिक निर्वाचन प्रणालीतर्फ मात्र मतदान गर्न पाउने जनाएको छ । ती मतदाताले प्रदेशसभातर्फको समानुपातिक निर्वाचन प्रणाली तर्फ भने मतदान गर्न पाउने छैनन् ।
निशान्त पोखरेलसमेतले दायर गरेको रिटमा सुनुवाइ गर्दै सर्वोच्च अदालतले निर्वाचन आयोगलाई मतदाता नामावली ऐन २०७३ को दफा ३० (१) र (२) को अस्थायी मतदाता नामावलीको व्यवस्था कार्यान्वयन गर्न र अस्थायी मतदाता नामावली संकलन गरी मतदानको अधिकार दिन आदेश दिएको हो ।