खरिद गरेको परिमाणमा इन्धन उपलब्ध गराउन निगमसंग ब्यवसायीको माग

बुटवल, २ असोज । नेपाल आयल निगम लुम्विनी प्रादेशिक कार्यालय भलवारी रुपन्देहीमा सरुवा भइ आएका प्रादेशिक प्रमुख जगदिशचन्द्र यादवलाई पश्चिमाञ्चल पेट्रोलियम डिलर्स एशोसिएसन, बुटवलले आइतबार स्वागत गरेको छ ।
एशोसिएसनले कार्यालयबाट सरुवा भई जान लागेका प्रादेशिक प्रमुख नवविनोद पोखरेललाई बिदाई र यादवलाई स्वागत गरेको हो ।
सो अवसरमा बोल्दै पेट्रोलियम व्यवसायीहरूले खरिद गरेको इन्धन नपुग्ने समस्या झेल्दै आएको बताउँदै यसको दीगो समाधान हुने गरी काम गर्न नयाँ कार्यालय प्रमुखलाई सुझाव दिए । डिपो बाट लोड भई ट्याङकर चालकले डिलर्स सम्म पुर्याउंदा खरिद गरेको भन्दा कम इन्धन पुग्ने समस्या देखिएको उनीको भनाइ छ ।
केन्द्रीय कार्यायलबाट सरुवा भई भलवारी डिपोमा आएका प्रमुख यादवले इन्धनको घाटा रोक्न व्यवसायीहरु लाग्नुपर्ने बताए । उनले इन्धन ल्याएको याङकरको रेकर्ड ब्यवसायीहरुले राखेर कार्यालयमा सूचना गरेमा त्यस्ता ट्यांकरलाई छानविन गरी कार्यालयले आवश्यक कारवाही अगाडि बढाउने बताए । ‘ट्याङकरको किलिनिङ गर्न जरुरी छ भन्दै उनले पम्पको नियमित चेकजाँच सँगै आगलागी घटना न्यूनीकरणका लागि पनि व्यवसायीहरुले सेफ्टी अपनाउन आवश्यक छ’ यादवले भने । उनले ब्यवसायीहरुसंग समन्वय र सहकार्य गरेर अगाडी बढ्ने बताउंदै नियतवस ब्यवसायीहरुलाई निरास बनाउने काम आफुवाट नहुने विश्वास दिलाए ।
कार्यक्रममा प्रादेशिक कार्यालयबाट केन्द्रीय कार्यालयमा सरुवा भएका प्रमुख नवविनोद पोख्रेलले ब्यवसायीका समस्याप्रति आफू जहाँ भए पनि सहयोग गर्न तयार रहेको बताए ।
एशोसिएसनका अध्यक्ष प्रेम न्यौपानेले लकिङ प्रणाली प्रभावकारी नभएको भन्दै त्यसतर्फ डिपोको ध्यान जान आग्रह गरे । ‘लकिङ प्रणाली जहाँ पायो त्यही नखुल्ने बनाउनपर्ने देखियो । जसले गर्दा चुहावट रोकिएन चालकका कारण खरिद गरेको इन्धन डिलर्ससम्म पुग्दा इन्धन पुग्दैन’ अध्यक्ष न्यौपानेले भने । पुरा मूल्य भूक्तानी गरेपछि पुरा परिमाणको इन्धन ब्यवसायीले पाउनु पर्ने भन्दै उनले यसतर्फ कार्यालय प्रमुखको ध्यानजानुपर्ने वताए । ब्यवसायीहरुले आफै अप्ठेरो र समस्यामा पर्ने गरी गलत काम नगर्ने भन्दै उनले निगमले ब्यवसायीहरुलाई सम्मान गर्नुपर्ने बताए ।
एशोसिएनका बरिष्ठ उपाध्यक्ष हिमाल गैरेले पेट्रोलियम ब्यवसायी निगमसंग सहकार्य र समन्वय गरेर अगाडी बढ्ने बताए । यस क्षेत्रका ब्यवसायीले विगत लामो समयदेखि इन्धन लसको समस्या भोग्दै आईरहेको भन्दै समस्या समाधान गर्ने तर्फ निगमको ध्यानजानु पर्ने बताए । एशोसिएसनका महासचिव हरिराम कसौधनले इन्धनको मूल्य बढे पनि व्यवसायीले पाउनुपर्ने कमिसन नबढ्दा घाटामा इन्धन विक्री गर्न बाध्य भएको गुनासो गरे । एशोसिएसनका प्रेस सल्लाहकार खिमानन्द भट्टराईले व्यवसायीका समस्या सम्वोधन गर्नेतर्फ नव आगन्तुक प्रमुखको ध्यान जानुपर्ने बताए ।
एशोसिएसनका अध्यक्ष प्रेम न्यौपानेको अध्यक्षतामा कार्यक्रम भएको थियो ।