भैरहवा, २४ भदौ । जिल्ला प्रहरी कार्यालय रुपन्देही र मातहतका प्रहरी कार्यालयबाट खटिएको प्रहरी टोलीले जिल्लाका बिभिन्न ठाउंबाट करिव २७ लाख बराबरको अवैध चिनी र कपडा वरामद गरेको छ ।
रुपन्देही प्रहरीले जिल्लाका बुटवल उपमहानगरपालिका र तिलोत्तमा नगरपालिकाबाट २६ लाख ६५ हजार ७५० बराबरको अवैध चिनी र कपडाहरु बरामद गरेको हो । वरामद चिनी र कपडासहित मानिस र गाडी आवश्यक कारवाहीको लागि भन्सार कार्यालय बेलहियामा बुझाईएको रुपन्देही प्रहरीले जनाएको छ ।
ईलाका प्रहरी कार्यालय बुटवलबाट खटिएको प्रहरी टोलीले बुटवल उप–महानगरपालिका वडा नं. १७ रानिगंज जनशक्ति टोल स्थित नारायणी न्यौपानेको घर कोठामा लुकाई छिपाई राखेको र घर बाहिर पार्किङ गरी राखेको लु ३ च १७७८ नम्बरको पिकअप र लु १ ख ८६५५ नम्बरको मिनी ट्रकमा बिल बिजक बिनाको अन्दाजी रु. १५ लाख ९७ हजार ५०० मूल्य बराबरको १८६ बोरा चिनी बरामद गरेको हो । प्रहरीले न्यौपानेको घरमा अबैध रुपमा भन्सार छली चिनी ल्याई गोदाम गरी राखेको भन्ने गोप्य सूचनाको आधारमा निजको घरमा खानतलासी गर्दा उक्त परिमाणको चिनी बरामद गरी दुईवटा गाडी नियन्त्रणमा लिएको हो ।
यस्तै ईलाका प्रहरी कार्यालय बुटवल रुपन्देहीबाट खटिएको प्रहरी टोलीले बुटवल उपमहानगरपालिका वडा नं. ७ दिपनगर बस्ने वर्ष ५५ को प्रेमनाथ अर्यालको घरबाट अन्दाजी रु २ लाख २७ हजार ५०० मूल्य बराबरको कुर्था सुरूवाल १६० पिस, साडी ७२ पिस, लुङ्गी २५ थान, थानको कपडा १० रोल बरामद गरेको छ ।
प्रहरीले अर्यालको घरमा भारतबाट अबैध रुपमा भन्सार छली कपडाहरु लुकाई छिपाई राखेको छ भन्ने गोप्य सूचनाको आधारमा अर्यालको घर खानतलसी गर्दा उक्त परिमाणको कपडा सहित निज अर्याललाई पनि नियन्त्रणमा लिएको छ ।
यसैगरी ईलाका प्रहरी कार्यालय बुटवलबाट खटिएको प्रहरी टोलीले तिलोत्तमा नगरपालिका वडा नं. ८ प्रदिपनगरबाट भारतबाट अबैध रुपमा भन्सार छली ल्याएको रु. ८ लाख ३० हजार ७५० मूल्य बराबरको २९ बोरा चिनी बरामद गरेको छ ।
प्रहरीले गोप्य सूचनाको आधारमा जिल्लाको रोहिणी गाउँपालिका वडा नं.२ बस्ने बर्ष २९ को प्रवेश यादवले चलाएको लु ४ प २११८, साही ठाउं बस्ने बर्ष २१ को रामबचन सहानीले चलाएको लु ५ प ६५३, वडा नं.७ बस्ने बर्ष १९ को सुनिल लोधले चलाएको भारतीय नं. प्लेटको यु पी ५३ डी एफ ८८८४ र देवदह नगरपालिका ८ बस्ने बर्ष २५ को ईश्वरी हिताङले चलाएको लु ४६ प ६८०१ नं. को माटरसाईकलमा ओसारपसार गर्दै गरेको १२ वोरा र सोही स्थानमा चाङ लगाई राखेको १७ बोरा गरी जम्मा २९ बोरा चिनी बरामद गर्नुका साथै मानिस र मोटरसाइकल समेत नियन्त्रणमा लिएको हो ।
