पेट्रोलियम पदार्थको मुल्य बृद्धिले ट्रक व्यवसाय समस्यामा

पालिका र संघसंस्थामा निर्वाचितलाई सम्मान
बुटवल, २२ असार । बदलिदो राजनीतिक व्यवस्था र पछिल्लो समय पेट्रोलियम पदार्थको बढ्दो मुल्य बृद्धिले ट्रक व्यवसायको पेशा गम्भिर स्थितिमा पुगेको व्यवसायीहरुले गुनासो गरेका छन् ।
पश्चिमाञ्चल यातायात व्यवसायी समिति बुटवलले आज (बुधबार) आयोजना गरेको नेपाल ट्रक यातायात व्यवसायी महासंघको महाधिवेशनवाट निर्वाचित पदाधिकारी तथा स्थानीय निकाय निर्वाचन–२०७९ बाट निर्वाचित जनप्रतिनिधि एवम् विभिन्न संघ संस्थाबाट निर्वाचित व्यक्तिहरुलाई सम्मान गर्न आयोजना गरिएको कार्यक्रममा वोल्ने यातायात ब्यवसायीहरुले यस्तो गुनासो गरेका हुन् ।
व्यवसायीहरुले राज्यले भाडादर प्रणाली कायम नगर्नाले घाटादर दैनिक रुपमा ओरालो लाग्दै गएकाले कहिलेकाहीँ ट्रक बेचौं भन्ने सोंचमा समेत पुग्ने गरेको गुनासो गरे ।
कार्यक्रममा नेपाल ट्रक यातायात व्यवसायी महासंघका पूर्व अध्यक्ष अर्जुन रानाभाटले सरकारले यातायात व्यवसायीको पक्षमा काम गर्नेहरुलाई प्रोत्साहन गर्न नसकेको गुनासो गर्नुभयो ।
नेपाल ट्रक यातायात व्यवसायी महासंघका बरिष्ठ उपाध्यक्ष लोकराज पोखरेलले यातायात क्षेत्रको खस्कदो अवस्थालाई सुधार गर्न चुनौति संगै अवसर पनि रहेको भन्दै सरकारले तय गरेको भाडादर कायम गर्न सकेमा ब्यवसायीलाई थोरै भएपनि राहत मिल्ने बताउनु भयो ।
यातायात क्षेत्रमा सह–चालक हुँदै चालक भएर २०७९ को स्थानीय तह निर्वाचनमा पाल्पाको तिनाउ गाउँपालिकाको अध्यक्षमा निर्वाचित प्रेम श्रेष्ठले बढ्दो महंगी र घट्दो भाडादरले नाफा भन्दापनि गाडीको खर्च समेत धान्न गाह्रो भएकाले पछिल्लो समय ट्रक व्यवसायीहरु निकै धरासायी बन्दै गएको भनदै दुख व्यक्त गर्नु भयो ।
पश्चिमाञ्चल यातायात व्यवसायी समितिका अध्यक्ष यमप्रसाद पाण्डेको अध्यक्षतामा भएको कार्यक्रममा नेपाल ट्रक यातायात व्यवसायी महासंघका उपाध्यक्ष विष्णु प्रसाद न्यौपाने, सचिव उमेशचन्द्र मजगैयाँ, संघका पूर्व अध्यक्ष गुप्तबहादुर केसी, अखिल नेपाल फूटवल संघका उपाध्यक्ष दीर्घ बहादुर केसी (कुमार), जिल्ला खेलकुद विकास समिति बुटवलका नवनियुक्त अध्यक्ष भुपेन्द्र वहादुर थापा क्षेत्री, संघका वरिष्ठ उपाध्यक्ष प्रताप बहादुर कार्की, महासचिव हरिप्रसाद कंडेललगायतले बोल्दै थला पर्दै गएको माल बाहक ढुवानी व्यवसायलाई चलायमान बनाउन व्यवसायीहरु बीचमा एकता जरुरी रहेको बताउनु भयो ।
सो अवसरमा पूर्व ब्यवसायी पाल्पाको तिनाउ गाउँपालिकाका अध्यक्ष प्रेम श्रेष्ठ, अखिल नेपाल फूटवल संघका नव निर्वाचित उपाध्यक्ष दीर्घ बहादुर केसी (कुमार)लगायतलाई सम्मान गरिएको थियो ।