लुम्बिनी, १० असार । प्रधानमन्त्री एवं लुम्बिनी बौद्ध विश्वविद्यालयका कुलपति शेरबहादुर देउवाले शिक्षा नै विकासको मार्गदर्शन भएको बताउनु भएको छ । उहाँले उच्च शिक्षा देशको स्रोत, साधन, सम्भावना, आवश्यकता र प्राथमिकतालाई पहिल्याई जनशक्ति तयार गर्नेतर्फ केन्द्रित हुनुपर्ने बताउनु भयो ।
प्रधानमन्त्री देउवाले शुक्रवार लुम्बिनी बौद्ध विश्व विद्यालयको द्वितीय दीक्षान्त समारोहलाई सम्बोधन गर्दै बुद्धले प्रतिपादन गरेको आर्य अष्टाङ्गिक मार्ग लगायतका सूत्रात्मक शिक्षा आजको २१ औँ शताब्दीमा पनि महत्वपूर्ण रहेको बताउनु भयो ।
प्रधानमन्त्री देउवाले बुद्धको मातृभूमि नेपाल विश्वकै लागि आस्था र श्रद्धाको केन्द्र रहेको बताउनु भयो । उहाँले बौद्ध दर्शन, कला, शिक्षा, साहित्य तथा संस्कृतिको मूल स्रोतका रुपमा आफूलाई सिद्ध गर्नुपर्ने चुनौति पनि हामीमा रहेको बताउनु भयो ।
प्रधानमन्त्री देउवाले बौद्ध विविधतालाई समाजको सकारात्मक रुपान्तरण सँग जोड्दै समाजको सिर्जनशील सदस्यका रुपमा आफूलाई स्थापित गर्न दीक्षित अग्रसर रहने विश्वास व्यक्तगर्नु भयो ।
लुम्बिनी बौद्ध विश्व विद्यालय बुद्ध जन्मस्थल लुम्बिनीमै हुनु भनेको विश्व विद्यालयको अपूर्व महत्व रहेको बताउँदै प्रधानमन्त्री देउवाले यस विश्व विद्यालयले बौद्ध अध्ययनका विभिन्न विद्याको अध्ययन अध्यापन गराउनुका साथै दैनिक जीवन एवं चिन्तन शैलीको अभिन्न अङ्गहुने गरी बौद्ध शिक्षाको देशव्यापी प्रचारप्रसारबाट समृद्ध मुलुक निर्माणको अभियानलाई सार्थकता दिन शिक्षाले महत्वपूर्ण भूमिका निभाउनुपर्नेमा जोड दिनुभयो ।
विश्व विद्यालयले आफूलाई बौद्ध दर्शन तथा शिक्षा पद्धतिको अध्ययन अध्यापनमा थप आकर्षक एवं अनुसन्धानमुखी कार्यक्रम सहितको अन्तर्राष्ट्रिय केन्द्रका रुपमा विकास गर्नुपर्नेमा प्रधानमन्त्री देउवाले जोड दिनु भयो ।
