बुटवल, १२ जेठ । रुपन्देहीको बुटवल उपमहानगरपालिकाका नवनिर्वाचित जनप्रतिनिधिले बुटवलका ६ वटा वडालाई कृषिको पकेट क्षेत्र घोषणा गरी सोहीअनुसारका कार्यक्रम ल्याउने उद्घोष गरेका छन् । नवनिर्वाचित मेयर खेलराज पाण्डेय र उपमेयर सावित्रा अर्यालले बुटवल उपमहानगरपालिका वडा नम्बर १४, १५, १६, १७, १८ र १९ नम्बर वडा कृषिका लागि उपयुक्त वडा रहेको भन्दै ती वडालाई कृषि क्षेत्रको पकेट क्षेत्र विभाजन गरी सोहीअनुसार ‘ग्रीन ल्याण्ड’ बनाउने बताएका हुन् ।
लुम्बिनी फलफूल तरकारी थोक व्यवसायी समिति र बुटवल कृषि उपज थोक बजार सञ्चालक समितिले बिहिबार बुटवलमा आयोजना गरेको बधाई तथा शुभकामना आदानप्रदान कार्यक्रममा बोल्दै नवनिर्वाचित मेयर पाण्डेयले बुटवलका ६ वटा वडालाई कृषिको विशेष क्षेत्र घोषणा गरी उत्पादनमा आधारित अनुदानसहितको कृषि क्षेत्र विकास गरिने बताएका हुन् ।
‘कृषि उपज केन्द्रको स्थान सानो भएको गुनासो आएकाले विज्ञ, विशेषज्ञसँगको छलफलपछि कृषि उपज केन्द्रलाई विस्तार गर्ने वा स्थानान्तरण गर्ने विषयमा हामी तयार रहेका छौं ।’ प्रमुख पाण्डेले भने ।
कार्यक्रममा नवनिर्वाचित उपप्रमुख सावित्रा अर्यालले बुटवलमा करोडौंको तरकारी आयात हुने गरेकोले त्यसमध्ये बुटवलका ६ वटा वडालाई प्रयोग गरेर आधा मात्रै भए पनि प्रतिष्थापन गर्न सकियो भने यसले किसान, व्यवसायी र उपभोक्ता सबैलाई राहत पुग्ने बताइन् ।
कार्यक्रममा बुटवल उपमहानगरपालिका वडा नम्बर ६ का वडाअध्यक्ष लेखनाथ न्यौपाने, बुटवल कृषि उपज थोक बजार सञ्चालक समितिका अध्यक्ष घनश्याम भुसाल (गोपाल), लुम्बिनी फलफूल तरकारी थोक व्यवसायी समितिका अध्यक्ष बाबुराम भुसाल, बुटवल कृषि उपज केन्द्रका व्यवस्थापक राम बहादुर खत्री लगायतले निर्वाचित मेयर उपमेयरलाई बधाई तथा शुभकामना ब्यक्त गर्दै ब्यवसायिक समस्याका बारेमा आआफ्ना धारणा राखेका थिए ।
