सैनामैना । रुपन्देहीको सैनामैना नगरपालिकाका नवनिर्वाचित प्रमुख फणिन्द्र प्रसाद शर्मा र उप प्रमुख बिना रानाले पदभार ग्रहण गरेका छन् ।
सोमबार शपथ ग्रहणपछि पदभार ग्रहण गर्दै नगर प्रमुख शर्माले सैनामैनामा बसोबास गर्ने अपाङ्गता भएका व्यक्ति, दलित, गरीब, जेष्ठ नागरिक, विपन्न तथा सुत्केरी महिलाको लागि जिल्लाभर लागू हुने गरी सैनामैना नगरपालिकाको खर्चमा निःशुल्क एम्बुलेन्स सेवा सञ्चालन गर्ने पहिलो निर्णयमा हस्ताक्षर गरेका छन् । उनले सैनामैनालाई नमूना पालिका बनाउन सवैको साझा पहल हुनुपर्नेमा जोड दिए ।
कार्यक्रममा रुपन्देही जिल्लाका मुख्य निर्वाचन अधिकृतबाट पद तथा गोपनियताको शपथ ग्रहण गरेका नगरप्रमुख शर्माले उपप्रमुख बिना राना मगर तथा सैनामैना नगरपालिकाका ११ वटै वडामा निर्वाचित वडाध्यक्ष र वडा सदस्यहरुलाई शपथ ग्रहण गराएका हुन् । शपथ ग्रहण पछि उप प्रमुख रानाले नगरपालिकाको कार्यकक्षमा र वडाध्यक्षहरुले आआफ्नो वडामा पदभार ग्रहण गरेका थिए ।
सैनामैना नगरपालिकामा निर्वाचित वडाध्यक्षहरुमा वडा नम्बर १ मा भुवन क्षेत्री, २ मा अम्मर कंडेल, ३ मा तम बहादुर पुर्जा, ४ मा राम प्रसाद अधिकारी, ५ मा धन प्रसाद पौडेल, ६ मा गोपाल पोख्रेल, ७ मा राजकुमार चौधरी, ८ मा बुद्धिराम चौधरी, ९ मा भानु पाण्डे, १० मा कृष्ण प्रसाद घिमिरे र वडा नम्बर ११ मा राम प्रसाद भुषाल रहेका छन् ।
शपथ तथा पदभार ग्रहण कार्यक्रममा सार्वजनिक लेखा समितिका सभापति भरत कुमार शाह, नगरपालिका प्रमुख प्रशासकीय अधिकृत भिमप्रसाद तिवारी, विभिन्न राजनीतिक दलका प्रतिनिधि, कर्मचारी लगायतको सहभागिता रहेको थियो ।
यसैगरी रुपन्देहीको देवदह नगरपालिकाका नवनिर्वाचित नगर प्रमुख ध्रुवप्रसाद खरेल र उपप्रमुख विद्यालक्ष्मी गुरुङले पनि पदभार ग्रहण गर्दै दुईवटा निर्णयमा हस्ताक्षर गरेका छन् ।
देवदह नगरपालिकालाई पूर्ण स्वास्थ्य बिमायुक्त नगरपालिका बनाउनका लागि सम्पूर्ण नगरवासीहरूलाई स्वास्थ्य बिमा कार्यक्रममा आबद्ध हुन आह्वान गर्ने निर्णय गरेका छन् । यस्तै देवदह नगरपालिकाको सुशासन प्रवद्र्धनका लागि प्रत्येक ६\६ महिनामा अनिवार्य रूपमा सार्वजनिक सुनुवाइ कार्यक्रम गर्ने निर्णय गरेका छन् ।
