बुटवल । तिलोत्तमाको आनन्दवन स्वास्थ्य चौकीमा निशुल्क स्त्री तथा प्रसुति रोग स्वास्थ्य शिविर सम्पन्न भएको छ । लायन्स क्लब अफ बुटवल देउरालीले तिलोत्तमा नगरपालिका वडा नंं. ६ को सहयोगमा एक दिने स्वास्थ्य शिविर गरेको हो । शिविर उद्घाटन गर्दै तिलोत्तमा नगरपालिकाकी उपप्रमुख जागेश्वरीदेवी चौधरीले नगरपालिकाले वडा वडामा स्वास्थ्य शिविरहरु सञ्चालन गर्ने नीति लिएको उल्लेख गर्नुभयो । उहांले बेलैमा रोग पत्ता लगाउन सके उपचार छिटो र सहज हुने भएकाले नियमित स्वास्थ्य परीक्षण गर्नुपर्ने बताउनु भयो ।
लायन्स क्लब इन्टरनेसनल ३२५ पी का द्वितीय भाइस गभर्नर पुरुषोत्तमभक्त प्रधानाङ्गले लायन्स क्लबहरुले समुदायको माग र आवश्यकता अनुसार सामाजिक र मानवीय सेवाका कार्यक्रमहरु सञ्चालन गर्नुपर्नेमा जोड दिनुभयो ।
लायन्स क्लब अफ बुटवल देउरालीका अध्यक्ष ज्ञानप्रसाद पौडेलले महिलाहरुमा प्रमुख समस्याको रुपमा रहेको पाठेघरको मुख र स्तन क्यान्सर पत्ता लगाउन स्वास्थ्य शिविर सञ्चालन गरिएको बताउनु भयो । शिविर सञ्चालन गर्न वडा कार्यालयले ३ लाख रुपैयां वजेट दिएको र क्लबले डेढ लाख रुपैयां बराबरको औषधि सहयोग गरेको अध्यक्ष पौडेलले बताउनु भयो । महिला संगै बालबालिकाको पनि स्वास्थ्य परीक्षण गरिएको शिविरमा लुम्बिनी प्रादेशिक अस्पतालका डा.वर्षा पौडेल र किरण सुवेदी तथा सिद्धार्थ बाल तथा महिला अस्पतालका डा. राजेन्द्र बस्यालले चेकजांच,भिडियो एक्सरे गरी आवश्यक परामर्श दिनुभएको थियो । शिविरमा करिब दुईसय जनाले स्वास्थ्य चेकजांच गरेका कार्यक्रम संयोजक विष्णु अधिकारीले जानकारी गराउनु भयो ।
कार्यक्रममा वडा अध्यक्ष सुखदेव न्यौपाने,क्लबका प्रथम उपाध्यक्ष रमेश पाण्डे,सचिव कृष्णप्रसाद भण्डारी लगायतले बोल्दै शिविरबाट सर्वधारणले लाभ लिएको धारणा राख्नुभएको थियो । कार्यक्रममा लायन्स इन्टरनेसनल ३२५ बी २ नेपालका गभर्नर रामप्रसाद भट्टले प्रदान गर्नुभएका करिब ५ लाख मूल्यको दुई थान अक्सिजन कन्सन्ट्रेटर मेसिन आनन्दवन स्वास्थ्य चौकीलाई हस्तान्तरण गरिएको थियो ।
