भैरहवा, १२ मंसिर । निजी तथा आवासीय विद्यालय अर्गनाइजेशन प्याव्सन सिद्घार्थनगर रुपन्देहीको आयोजनामा हस्तलेखन प्रतियोगिता सम्पन्न भएको छ । कक्षा एकदेखि तीनसम्मका विद्यार्थीहरु सम्मिलित प्रतियोगितामा सिद्घार्थनगरमा सञ्चालित निजी तथा आवासीय विद्यालयका विद्यार्थीहरुले सहभागिता जनाएका थिए । नेपाल नालन्दा मा.वि को प्राङ्गणमा प्रतियोगिता सम्पन्न भएको थियो ।
प्रतियोगितामा सन शाइन माविकी छात्रा जेनिफर गर्ग आचार्य प्रथम, जेसिज हाई स्कूलका छात्र सोहन पछाइ द्वितीय, बृहस्पति हाई स्कूलकी छात्रा एनिशा थापा तृतीय र युनिभर्सल पब्लिक हाई स्कूलकी छात्रा ममता साहनी सान्त्वना भएको कार्यक्रम संयोजक युवराज पोख्रेलले जानकारी दिनुभयो ।
कार्यक्रममा प्याब्सन लुम्बिनी प्रदेश सदस्य महेश भुर्तेलले प्याव्सन सिद्घार्थनगरले विद्यार्थीहरुको हस्तलेखन कला राम्रो बनाउन प्रतियोगिता आयोजना गर्नु प्रशंसनीय रहेको बताउनुभयो । विजयी विद्यार्थीहरुलाई पुरस्कार एवम् बधाई दिँदै भुर्तेलले विद्यार्थीहरुले हरेक क्रियाकलापमा सक्रिय सहभागिता जनाउनुपर्नेमा जोड दिनुभयो । प्रतियोगितामा भैरहवा बहुमुखी क्याम्पसका प्राध्यापक कौशल राज गौतमले निर्णयकको भूमिका निर्वाह गर्नुभएको थियो ।
कार्यक्रम प्याव्सन सिद्घार्थनगर अध्यक्ष गोकुल पोखरेलको अध्यक्षता, कार्यक्रम संयोजक युवराज पोखे्रलको स्वागत तथा सचिव राजेन्द्र घिमिरेको सञ्चालनमा भएको थियो ।
