रुपन्देही व्यापार संघको २१ औं स्थापना दिवस

डिभाइडर बगैंचा बुटवल उपमहानगरपालिकालाई हस्तान्तरण
बुटवल, २८ कात्तिक । रुपन्देही व्यापार संघले आफ्नो २१ औं स्थापना दिवसको अवसरमा सिद्धार्थ राजमार्ग अन्तरगत बुटवल नगरमा संघले निमार्ण गरेको हरियालीसहितको डिभाइडर बगैंचा बुटवल उपमहानगरपालिकालाई हस्तान्तरण गरेको छ ।
संघले आइतवार एक कार्यक्रमको आयोजना गरेर निर्माण सम्पन्न भएको डिभाइडरको चावी बुटवल उपमहानगरपालिकाकी उपमेयर गुमादेवी आर्चायलाई हस्तान्तरण गरेको हो । बुटवल उपमहानगरपालिकाको डिजाइनमा निमार्ण गरिएको १ सय २० मिटरको डिभाइडरमा वृक्षारोपण समेत गरिएको छ ।
हस्तान्तरण कार्यक्रममा बोल्दै उपमेयर आचार्यले नगरको विकासमा नीजि क्षेत्रको सहकार्यमा धेरै योजनाहरु सञ्चालन गरिएको बताउदै नगरलाई हरियाली र स्वच्छ राख्न सबै नगरवासीहरुलाई आग्रह गर्नु भयो । उहांले नीजि क्षेत्रका उद्योगी व्यवसायीहरुसंग स्थानीय सरकार सधै सहकार्य गरेर अगाडी बढ्दै आएको स्मरण गराउदै कुनै पनि समस्या भएमा आपसी छलफल गरि समाधान गर्न अग्रसर हुने प्रतिवद्धता व्यक्त गर्नु भयो ।
संघका पूर्व अध्यक्ष मोतिलाल पाण्डेले रुपन्देही व्यापार संघ निश्चित मान्यता, लक्ष्य र उद्देश्यका लागि स्थापना भएको उल्लेख गर्दै त्यसका गतिविधिहरु पनि त्यसै अनुसार हुनुपर्ने धारणा राख्नुभयो ।
पूर्व अध्यक्ष टंक प्रसाद पोखरेलले व्यवसायीक हितका लागि आगामी दिनमा छुट्टै प्रकारले कार्यक्रम अगाडी ल्याउनु पर्ने सुझाव दिनु भयो ।
संघका अध्यक्ष यमलाल लोहनीले संघको २१ औं स्थापना दिवसका अवसरमा संघलाई थप व्यवस्थित र सक्रिय बनाउने प्रेरणा प्रदान गर्ने बताउदै संघ आफ्नो उद्देश्य र लक्ष्यमा सधै कटिबद्ध भएर अगाडी बढ्ने धारणा राख्नु भयो । उहाले नीजि क्षेत्रका व्यवसायीहरुको हकहितका लागि आवश्यक रणनीति बनाएर संघले स्थानिय सरकारसंगको सहकार्यलाई अझ बलियो बनाउदै जाने भनाई राख्नु भएको थियो ।
संघका महासचिव दयानीधि भण्डारीको सञ्चालनमा भएको कार्यक्रममा विभिन्न जातका फुलका विरुवाहरु रोपिएको थियो ।