बुटवल, १६ कात्तिक । यो बर्ष भाईटीका कात्तिक २० गते शनिबार परेको छ । नेपाल पञ्चाङ्ग निर्णायक समितिका अनुसार यस दिन बिहान ११ः०२ बजे भाइटीकाको उत्तम साइत रहेको छ । सर्वसाधारणका लागि मध्याह्नकालमा टीका लगाउनु पनि शास्त्रसम्मत् नै हुने समितिले जनाएको छ । राज्य सञ्चालकले भने साइतमा टीका लगाउनुपर्छ । भाइपूजा र नेवारी भाषामा किजापूजा कात्तिक २० गते नै गरिन्छ । बेलुकी सूर्यास्त नभएसम्म भाइटीका लगाउन कुनै समस्या नरहेको समितिले जनाएको छ ।
झिलीमिलीको चाड पनि भनिने तिहारका अवसरमा एक हप्ता अघिदेखि नै रुपन्देहीका बुटवल, भैरहवालगायत देशका प्रमुख शहरमा थरी थरीका बत्ती बाल्न शुरु भइसकेको छ ।
तिहारका अवसरमा रमाईलोको लागि पटाका पड्काउने गरिए पनि पछिल्लो समय यो विकृतिका रुपमा फैलिएको छ । जथाभावी पटाका पट्काउने गर्दा दुर्घटना हुने, आगलागी हुने, अरुलाई लागेर घाइते हुने लगायतका घटना पनि घट्न सक्ने भएकाले नेपाल प्रहरीले पटाका नपट्काई सभ्य रुपमा पर्व मनाउन आह्वान गरेको छ ।
