बुटवल, १४ कात्तिक । बुटवलमा सिर्जनशील चित्रकला प्रदर्शनी शुरू भएको छ । २ दिनसम्म संचालन हुने चित्रकला प्रर्दशनीको बुटवल उपमहानगरपालिकाका प्रमुख शिबराज सुबेदीले एक समारोहबिच आईतबार उद्घाटन गर्नुभयो ।
उहांले कला संस्कृतिको सम्मान र संरक्षणका लागि बुटवलले नमुना कार्यको थालनी गरेको बताउनु भयो । नगरमा बुटवल प्रज्ञा परिषद् बनाएर काम गरिएको बताउंदै उहांले समयमै कला संस्कृतिको संरक्षण र जगेर्ना गर्न नसके ठूलो समस्या निम्तिन सक्ने चेतावनी दिनुभयो ।
बुटवल उपमहानगर भाषा, साहित्य, कला, संस्कृति प्रतिष्ठान अन्तर्गत गठित कला तथा अनुसन्धान विभागको संयोजन र नेपाल व्यवसायिक कलाकार संघ, रुपन्देहीसंगको सहकार्यमा चित्रकला प्रर्दशनी आयोजना गरिएको हो । प्रदर्शनीमा चित्रकला सम्बन्धि विषयवस्तु सुमित्रा रानाले प्रस्तुत गर्नुभयो ।
सो अवसरमा बोल्दै उपमहानगरकी उपमेयर गोमादेबी आचार्यले परिषदको सक्रियताको प्रशंसा गर्नुभयो । उहांले संस्कार र संस्कृतिको जगेर्नामा लाग्नुपर्ने धारणा राख्नुभयो । प्रतिष्ठानका अध्यक्ष झपेन्द्र जिसीको अध्यक्षता तथा प्रतिष्ठानका सचिब दलबहादुर गुरुङको संचालनमा उद्घाटन कार्यक्रम भएको हो ।
सो अवसरमा कला तथा अनुसन्धान विभागका सदस्यहरु झविन्द्र थापा, बेनप्रसाद थापा लगायलते आआफ्ना भनाई राख्नुभएको थियो । चित्रकला प्रदर्शनीमा २० जना चित्रकारले ४० तस्वीर प्रदर्शनका लागि राखेका छन् । बुटवलको न्यु इरा होटलमा शुरू भएको चित्रकला प्रदर्शनीमा निशुल्क प्रबेशको ब्यबस्था मिलाइएको बुटवल उपमहानगर भाषा, साहित्य, कला, संस्कृति प्रतिष्ठान अन्तर्गतको बिद्वत परिषद्का सदस्य कपिल ज्ञवालीले जानकारी दिनुभयो । प्रदर्शनीको सोमबार समापन गरिने छ ।
