भैरहवा, १६ असोज । टुगा आस्था विकास बचत तथा ऋण सहकारी संस्था लिमिटेडको तेस्रो वार्षिक साधारण सभा सम्पन्न भएको छ ।
शनिवार तिलोत्तमा नगरपालिका वडा नम्बर १५ कोटिहवामा भएको साधारणसभाको उद्घाटन गदै बचत तथा ऋण सहकारी संघ नेपाल (नेफ्स्कुन) लुम्बिनी प्रदेशका अध्यक्ष कृष्ण नेपालले बित्तीय कारोवार गर्ने संस्थाले बित्तिय सुरक्षा गर्न सके संस्था सफल हुने बताउनुभयो । पछिल्लो समय केही सहकारीले शुरुवाती समयमा लोकप्रियताको लागि बढि नाफा देखाउने र नाफा बांड्ने तर जगेडा कोषमा पैसा नहुँदा सदस्यले मागेको समयमा बचत फिर्ता गर्न नसकेर धरासायी भएको अवस्था रहेको भन्दै यसतर्फ सजग हुन आग्रह गर्नुभयो ।
कार्यक्रममा संस्थाका अध्यक्ष डि बि थापाले वार्षिक प्रतिवेदन प्रस्तुत गर्दै दुई बर्ष अघि तिन वटा सहकारी संस्था एकिकरण पछि बनेको टुगा आस्था विकास बचत तथा ऋण सहकारी संस्थाको मुख्य उद्देश्य बित्तीय सुशासन, प्रतिस्पर्धी तथा समुदायमा आधारित उत्कृष्ट सहकारीको रुपमा अघि बढ्नु रहेको बताउनु भयो । थापाका अनुसार हाल ६७ करोड पुँजीमा निर्माण भएको टुगा आस्थामा तिनवटा पालिकाको ८ वडा कार्यक्षेत्रका ५४ सय सदस्य आवद्ध रहेका छन् ।
संस्थाका सचिव जित बहादुर रास्कोटीको संचालनमा भएको कार्यक्रममा नेफ्स्कुन कार्यक्रम अधिकृत मनोज खड्का, राष्ट्रिय सहकारी बैंक भैरहवाका शाखा प्रमुख आलोक सिवाकोटी, कोषाध्यक्ष लाल बहादुर थापा, प्रमुख सल्लाहकार तारा प्रसाद छन्तेल, बरिष्ठ सल्लाहकार भिम बहादुर पुन लगायतले धारणा रख्नुभएको थियो ।
उपाध्यक्ष परशुराम बास्तोलाले स्वागत गर्नुभएको कार्यक्रममा लेखा संयोजक घनश्याम कठरिया थारुले लेखा सुपरिबेक्षण प्रतिवेदन प्रस्तुत गर्नुभएको थियो । कार्यक्रममा उत्कृष्ट बचतकर्ता, ऋणी र सदस्य बिस्तार अभियानकर्तालाई सम्मान गरिएको थियो ।
टुगा आस्था विकास बचत तथा ऋण सहकारी संस्था लिमिटेडको आर्थिक बर्ष २०७७–०७८ को आषाढ मसान्त सम्म सदस्य संख्या ५ हजार २ सय ७६ जना जसमा २ हजार ४ सय ४७ जना महिला र २ हजार ८ सय २७ जना पुरुष रहेका छन् भने २ जना सदस्य संस्थागत रहेका छन् । संस्थाको सेयर पूंजी ६ करोड ८२ लाख ५ हजार, कर्जा लगानी ५२ करोड ४८ लाख २ हजार ८० र बचत ५० करोड ३९ लाख २४ हजार ६ सय २० रुपैया रहेको छ ।
संस्थाले बचत तथा ऋण बाहेक रेमिट सेवा, बिमा र मोवाईल बैंकिङ मार्फत पनि सेवा दिदै आएको छ । टुगा आस्था विकास बचत तथा ऋण सहकारी संस्था लिमिटेडको ओमसतिया गाउँपालिका वडा नं १,२,३, सियारी गाउँपालिकाको वडा नं १ र तिलोत्तमा नगरपालिका वडाहरु ७,८,९,१३,१४,१५,१६ मा कार्यक्षेत्र रहेको छ । संस्थाले सदस्यहरुलाई ६ देखि ९.५ प्रतिशत ब्याजदर दिने गरेको छ भने सदस्यबाट ८.९९ देखि १२ प्रतिशत सम्म ब्याजदर लिने गरेको छ ।
संस्थाको आयकर अघिको मुनाफा १ करोड ४४ लाख ८१ हजार ४ सय १७ रुपैया रहेको छ । संस्थाको कुल पूंजी तथा दायित्व ६३ करोड ९२ लाख १७ हजार ७ सय १ रुपैया रहेको छ ।
