बुटवल, ५ भदौ । रुपन्देहीको शसस्त्र प्रहरीले आन्तरिक राजस्व कार्यालय लेखेको दुई करोड ३५ लाख ६३ हजार बराबर मूल्यको नक्कली स्टिकर सहित दुई जनालाई पक्राउ गरेको छ ।
शसस्त्र प्रहरी बल डण्डा बर्डर आउट पोष्टबाट शसस्त्र प्रहरी निरिक्षक कृष्ण प्रसाद अर्यालको कमाण्डमा खटिएको टोलीले भैरहवाको दरखसवाबाट ८० रोल (प्रतिरोल ३ हजारका दरले जम्मा २ लाख ४० हजार) स्टिकर बरामद गरेको शसस्त्र प्रहरी उपरिक्षक राजेश उप्रेतीले जानकारी दिनुभयो ।
सिद्धार्थनगर नगरपालिका वडा नम्बर ३ दरखसवाको एउटा घरमा अवैध मालबस्तु लुकाइराखेको भन्ने बिशेष सूचनाको आधारमा हिजो शसस्त्र प्रहरी निरिक्षक अर्यालको कमाण्डमा उक्त घरमा खानतलासी गरिएको थियो । खानतलासीबाट उक्त नक्कली स्टिकरको रहस्य खुलेको हो । बरामद गरिएको स्टिकरमा आन्तरिक राजस्व बिभाग लेखिएको र उक्त स्टिकर २ करोड ३५ लाख ६३ हजार बराबर रहेको आन्तरिक राजस्व कार्यालयको प्रारम्भिक विवरणबाट देखिएको एसपी उप्रेतीको भनाई छ ।
५० युपी १ सय ८० मिलिलिटरको २ लाख ४० हजार थान स्टिकर मध्ये आयकरको १० लाख बराबर, मुल्य अभिवृद्धि करको ३१ लाख ६३ हजार र सबै भन्दा बढी अन्तःशुल्कको १ करोड ९४ लाखको स्टिकर रहेको छ ।
स्टिकर संगै शसस्त्र प्रहरीले सिद्धार्थनगर नगरपालिका वडा नम्बर ३ दरखसवा बस्ने २३ बर्षिय साहिद अन्सारी र २४ बर्षिय अमानत अलिलाई पक्राउ गरेको उप्रेतीले जानकारी दिनु भयो ।
पक्राउ परेका ब्यक्तिहरुको बयानकै आधारमा उक्त समान ढुवानी गर्न प्रयोग गरिएको लु २ च २५० नम्बरको गाडी तथा गाडीमा रहेको मालबस्तु समेत नियन्त्रणमा लिइ स्टिकर सहित राजस्व अनुसन्धान कार्यालय बुटवलमा प्राप्त भएको कार्यालय प्रमुख राजन विसीले बताउनु भयो । यसवारे थप अनुसंन्धान हुने पनि प्रमुख विसीले बताउनु भयो ।
