जसपा लुम्बिनी प्रदेश समितिद्वारा सर्वोच्चको फैसलाको स्वागत

बुटवल,२८ असार । जनता समाजवादी पार्टी (जसपा) लुम्बिनी प्रदेश समितिले विघटित प्रतिनिधि सभा पुनस्र्थापना गर्दै २४ घण्टाभित्र नेपाली काँग्रेसका सभापति शेरबहादुर देउवालाई प्रधानमन्त्री नियुक्त गर्न गरेको फैसलाको स्वागत गरेको छ । पार्टीका प्रदेश अध्यक्ष अशोककुमार यादव र मुख्य सचिव यज्ञ पोखरेलले प्रेस विज्ञप्ति जारी गर्दै सर्वोच्चको फैसलाले मुलुकमा संविधानवादको जित भएको र सर्वोच्च अदालतप्रति जनताको विश्वास बढाएको उल्लेख गर्नुभएको छ । प्रधानमन्त्री केपी शर्मा ओलीले आफ्नो सत्ता जोगाउन संविधानलाई कुल्चेर स्वेच्छाचारी र निरंकुश ढंगले अघि बढ्दै जननिर्वाचित सर्वोच्च संस्था प्रतिनिधि सभालाई पटक पटक विघटन गरेर मुलुकलाई अन्योलता र अंध्यारो सुरुङभित्र धकेल्ने दुस्प्रयास सर्वोच्चको फैसलाले असफल गराइदिएको र यसले संविधानमा आस्था राख्ने आम नेपाली जनताको जित भएको विज्ञप्तिमा उल्लेख छ । प्रतिनिधि सभा विघटनविरुद्ध जनता समाजवादी पार्टी सबैभन्दा पहिला अग्रमोर्चामा उभिएर आन्दोलनमा होमिएको स्मरण गर्दै अब नयां परिस्थितिमा प्रतिगमनविरोधी सबै लोकतान्त्रिक शक्तिहरु एकतावद्ध भई मुलुकलाई सही निकास दिनुपर्ने विज्ञप्तिमा आग्रह गरिएको छ । प्रतिनिधि सभा पुनस्थापनाको फैसला गर्ने न्यायमूर्तिहरुप्रति जसपा लुम्बिनी प्रदेश समितिले विज्ञप्तिमार्फत उच्च सम्मान प्रकट गरेको छ ।