वडा कार्यालय देखि विद्यालय र व्यक्तिको घरमा चोरी
प्रविण गाहा
गुल्मी, २५ असार । गुल्मीको साविक जुभुङ गाविसमा बिहीवार राती वडा कार्यालय, विद्यालय र निजी घरमा चोरी भएको छ । गुल्मी दरवार गाउँपालिका वडा नं. २, जुभुङको वडा कार्यालय, सुर्योदय माध्यमिक विद्यालय हटिया, महाकाली आधारभुत विद्यालय ठुलाचौर र केही निजी घरमा तालाफोडी चोरी भएको हो । सुर्योदय माविबाट करिव १० हजार नगद चोरी भएको विद्यालयका प्रधानाध्यापक सन्तोष गौतमले जानकारी दिनुभयो । विद्यालयमा रहेको सिसिटिभी क्यामेरामा कैद भएको दृश्यमा एक जना व्यक्तिले हातमा पञ्जा, ताला फोड्ने रड, घन प्रयोग गरी चोरी गरेको विद्यालयका प्रधानाध्यापक गौतमको भनाई छ । रातको एक बजेको आसपासमा चोरी भएको सिसिटिभीमा दृश्य कैद भएको छ ।
त्यस्तै ठुलाचौरमा रहेको महाकालीबाट करिव १५ हजार चोरी भएको विद्यालयका प्रधानाध्यापक कुलानन्द गौतमले जानकारी दिनुभयो । पुरानो र नयाँ भवनमा रहेको कार्यालय फोडी चोरी गरेको पाइएको छ ।
त्यस्तै वडा कार्यालयको तालाफोडी दराज समेत फोडेको पाइएको छ । कार्यालयमा नगद नराखिएको हुदा चोरी हुन नपाएको वडा अध्यक्ष हरिहर गौतमले जानकारी दिनुभयो । कागजपत्र र अन्य सामाग्री चोरी नभएको वडा अध्यक्ष गौतमको भनाई छ । उहांका अनुसार अन्य केही व्यक्तिको घरबाट समेत नगद चोरी भएको छ । कसैको घरमा ताला मात्र फोडेको पाइएको छ ।
हटियामै चुर्न प्रसाद श्रेष्ठको दुई थान मोवाईल, उर्लाकोटमा तिलबहादुर रजालीको किराना र नास्ता पसलबाट करिव नौं हजार चोरी भएको स्थानिय शिक्षक कमल सारुले जानकारी दिनुभयो ।
विद्यालयमा भर्ना अभियान चलेको र असार मसान्तमा वडामा आर्थिक क्रियाकलाप हुने हुदा चोरी गर्नेको निशानामा विद्यालय र वडा कार्यालय परेको हुन सक्ने स्थानियको आशंका छ ।
नगदमात्रै चोरको निशानामा पर्नुले घटना योजनावद्व भएको हुन सक्ने आशंका गरिएको छ । चोर पसेपनि कार्यालयमा रेहका कागजपत्र र ल्यापटप जस्ता महत्वपुर्ण विद्युतिय साधन भने सुरक्षित रहेको छ ।
जुभुङमा हरेक वर्ष चाडपर्वको आसपासमा चोरी हुने गरेको छ । केहीवर्ष अघि हटियामा होटल व्यवसायगरी बस्ने नेवार राईला÷राईली उपनामले परिचित बृद्व दम्पत्तीलाई बन्धक बनाई ठुलो परिमाणमा सुन र नगद चोरी भएको थियो । होटलमा ग्राहक बनेर रातको बास बस्न आएका व्यक्तिबाट चोरी भएको थियो । हाल ती दम्पत्तीको देहवसान भैसकेको छ ।
हरेक वर्ष साना÷ठुला चोरी हुने तर चोरीमा संलग्नलाई पक्राउ गर्न प्रशासन असफलहुंदा यस्ता घटना दोहोरिने गरेको छ । चोरी डकैती नियन्त्रण गर्न हरेक व्यक्ति चनाखो भएर ख्याल गर्नु पर्ने वडा अध्यक्ष गौतमको भनाई छ । समाजमा हुने यस्ता क्रियाकलाप रोक्न सबै आ–आफ्नो ठाउंबाट सजग र सचेत बनी सहयोग गर्नुपर्नेमा अध्यक्ष गौतमले जोड दिनुभयो ।
