नागरिकको जिउ, धन र स्वास्थ्य सुरक्षाका लागि खोप माग

बुटवल, १० असार । स्वतन्त्र नागरिक समूह, नेपालले नागरिकको लागि सरकारसंग कोराना बिरुद्दको खोपको माग गरेको छ । नागरिकको जिउ, धन र स्वास्थ्य सुरक्षाका लागि नेपालका सबै नागरिकलाई कोरोना बिरुद्दको खोपको व्यवस्था गर्न स्वतन्त्र नागरिक समूहले माग गरेको हो ।
स्वतन्त्र नागरिक समूहका अध्यक्ष विश्वराज गैह्रेले एक विज्ञप्ती निकाली सरकारको यस आर्थिक वर्षको सम्पूर्ण श्रोत कोभिड बिरुद्दको खोपमा लगानी गर्न सरकारसंग माग गर्नुभएको छ । ‘आमनागरिकको स्वास्थ्य उपचारमा सरकार जवाफदेही र जिम्मेवार बन्न नसकेका कारण कोभिड–१९ बाट हजारौं नेपाली नागरिक प्रभावित भई, सयौं नागरिकले मृत्युवरण गर्नु नेपाल र नेपालीको लागि दुर्भाग्य हो ।’ विज्ञप्तीमा उल्लेख गरिएको छ । कोभिड–१९ को महामारीबाट प्रत्येक नेपाली प्रभावित भइरहेको अवस्थामा त्यसको समाधानतर्र्फ दत्तचित्त भएर लाग्नुको बदला सरकार सत्ताको खेलमा मात्र लागिपर्दा नागरिक मर्माहत हुनुपरेको उल्लेख छ । विज्ञप्तीमा भनिएको छ नागरिक प्रतिको दायित्व वहनमा सरकारको उदासिनता देखिनु लज्जास्पद र खेद जनक छ ।