काँग्रेसद्वारा ३३ जिल्लाका ६५ स्थानको क्रियाशिल सदस्यको नामावली सार्वजनिक

काठमाडौँ, ३१ जेठ । १४ औं महाधिवेशनको तयारीमा रहेको नेपाली काँग्रेसले थप ३३ जिल्लाका क्रियाशील सदस्यहरुको नामावली सार्वजनिक गरेको छ । काँंग्रेसले थप ३३ जिल्लाका ६५ स्थानको क्रियाशील सदस्यताको नामावली पार्टीको वेबसाइट मार्फत् सार्वजनिक गरेको हो । यस अघि काँग्रेसले १०१ स्थानको क्रियाशिलको विवरण सार्वजनिक गरेको थियो ।
हालसम्म सार्वजनिक गरिएका नामावली उपर कुनै उजुरी, गुनासा वा सुझाव भएमा सम्बन्धित पार्टी निकाय वा व्यक्तिले आगामी असार ६ गतेभित्र प्रमाणसहित केन्द्रीय क्रियाशील सदस्यता छानविन समितिमा सम्पर्क गर्न सक्ने छन् ।
क्रियाशिल सदस्यता छानविन समितिका सचिव केशव रिजालका अनुसार नामावलीमा कुनै त्रुटी भएको भए वा छुट भएको भए नयाँ सदस्यतातर्फ प्रतिनिधि सभा क्षेत्रीय कार्यसमितिले र नवीकरण तर्फको जिल्ला कार्यसमितिले स्पष्ट आधार र प्रमाणसहित त्रुटी सच्याइदिनका लागि वा नाम समावेश गरिदिनका लागि असार ६ गतेभित्र पठाइसक्नुपर्ने छ ।
समितिका सचिव रिजालले काँग्रेसका क्रियाशील सदस्यताको नामावली सप्तरी, बारा, सिन्धुपाल्चोक, प्यूठान, बर्दिया, रुकुम पश्चिम र डडेलधुरा गरी ७ जिल्लाबाट आउन बाँकी छ । ती जिल्लामा आन्तरिक समायोजन, शुल्क विवाद लगायतका समस्याका कारण काम हुन नसकेको बताइएको छ ।
यसअघि सार्वजनिक गरिएका र थप सार्वजनिक गरिएका नामावलीहरु हेर्नका लागि www.nepalicongress.org मा क्लिक गरि हेर्न सकिने नेपाली काँग्रेसले जनाएको छ । काँग्रेसको १४ औं महाधिवेशन आगामी भदौ १६ गतेबाट काठमाडौंमा सुरु हुँदैछ ।