बुटवल ११ पुस
लुम्बिनी प्रदेशका उद्योग, पर्यटन, वन तथा वातावरणमन्त्री लिला गिरीले सहकारीलाई उत्पादन मूलक क्षेत्रमा लगानी गर्ने गरी अगाडि बढाउनुपर्ने बताउनु भएको छ् ।
सामूहिक विकास बचत तथा क्रृण सहकारी संस्था तिलोत्तमा–२ शंकरनगरको वार्षिक साधारणसभामा मन्त्री गिरीले सहकारीले गर्ने लगानीलाई उत्पादनमूलक क्षेत्र र कृषिमा लगाउनुपर्ने बताउनु भयो ।
“सहकारीको लगानीबाट आलु, दूध, तरकारी लगायत विभिन्न कृषि वस्तुहरुको उत्पादन बढाउन सकिन्छ, जलविद्युतमा पनि लगानी गर्नु उपयुक्त हुन्छ”– उहांले भननु भयोे । उद्योग धन्दा र कलकारखाना खोल्नका लागि ठूलो लगानीको आवश्यकता पर्ने भएकाले ठूलो लगानी गर्ने गरी अब सहकारीहरु एककीकरण हुनुपर्नेमा मन्त्री गिरीले जोड दिनु भयो ।
मन्त्री गिरीले कुनै पनि ऐन कानुन सुविधाका लागि र संस्थालाई अनुशासनमा राख्नका लागि रहेको भन्दै सहकारीसम्बन्धी ऐनले अप्ठेरो पारे त्यसलाई फुकाउन आफूले पहल गर्ने बताउनु भयो । “ऐन सुविधाका लागि हो, यसलाई परिवर्तन गर्न सकिन्छ, सहकारी सञ्चालनमा ऐनले बाधा पु¥याए अप्ठेरो फुकाउन मैले पहल गर्छु”–उहांको कथन थियोे ।
कार्यक्रममा तिलोत्तमा नगरपालिकाका प्रमुख वासुदेव घिमिरेले थोरै संख्याबाट सुरु भएको सहकारी अहिले हजारौंको संख्यामा सदस्य बढाउन सफल भएको भन्दै आर्थिक समृद्धिमा सहकारीको योगदान महत्वपूर्ण रहेको बताउनु भयो । उहांले आर्थिक उपार्जनका लागि सहकारी प्रमुख रहेको उल्लेख गर्दै सहकारी एकीकरणलाई अगाडि बढाउनु पर्नेमा जोड दिनु भयो ।
कार्यक्रममा वार्षिक प्रतिवेदन प्रस्तुत गर्दै संस्थाका अध्यक्ष सुरेन्द्रकुमार बर्माले संस्थाको शेयर पुँजी २४ करोड६२ लाख ९५ हजार, क्रृण लगानी, एक अर्व ८९ करोड, ७० लाख ५५ हजार ७६५ पुगेको जानकारी दिनु भयो ।
