तिलोत्तमा, २ भदौ । छिमेकी पालिकाहरुले लकडाउन गरेपछि रुपन्देहीको तिलोत्तमा नगरपालिकाले पनि नगर क्षेत्रमा लकडाउन गर्ने निर्णय गरेको छ । समुदायस्तरमा कोरोना संक्रमण दर बढ्दै गएपछि नगरस्तरीय विपद् व्यवस्थापन समितिको बैठकले भदौ ३ गते साँझ ७ बजेदेखि भदौ १० गते साँझ ७ बजेसम्म लकडाउन गर्ने निर्णय गरेको हो ।
सुरक्षा निकाय, राजनीतिक दल र निजी क्षेत्रका प्रतिनिधि समेतको उपस्थितिमा मंगलबार बिहान बसेको बैठकले एकहप्ता पूर्ण लकडाउन गर्ने निर्णय गरेको नगरपालिकाका प्रवक्ता सुरेन्द्र श्रीले जानकारी गराउनु भयो ।
बैठकले लकडाउन अवधिमा सबै खाद्यान्न र तरकारी सहित सबै प्रकारका पसल व्यवसाय, उद्योगधन्दा, कलकारखाना, निर्माण कार्य, बैंक, वित्तीय संस्था, सहकारी, सरकारी तथा गैरसरकारी संस्थाका कार्यालय र सबै खाले सवारीसाधन सञ्चालन गर्न नपाइने निर्णय गरेको छ ।
लकडाउनमा दूध डेरीहरु बिहान ६ देखि ८ बजेसम्म खुल्न पाउने छन् भने औषधि पसल र औषधि उद्योगहरु सञ्चालन हुन पाउने छन् । तिलोत्तमा नगरपालिकाले लडकडाउन अवधिमा साइकलसमेत नचलाउन आग्रह गरेको छ ।
