काठमाडौं, २८ साउन । गृह मन्त्रालयले अन्तरजिल्ला सवारी पास अनिश्चितकालका लागि बन्द गरेको छ ।
अत्यावश्यक कामका लागि भन्दै जिल्ला प्रशासन कार्यालयहरुले बितरण गर्दै आएको अन्तरजिल्ला सवारी पास कोभिड–१९ संक्रमणको उच्च जोखिमलाई मध्यनजर गरी अर्को ब्यवस्था नभएसम्मका लागि गृह मन्त्रालयले रोकेको हो ।
बुधबार गृह मन्त्रालयका शाखा अधिकृत अमर दिप सुनुवारद्वारा सबै जिल्ला प्रशासन कार्यालयहरुलाई जारी गरिएको परिपत्रमा साउन २९ गते बिहिबारदेखि लागु हुनेगरी सबैखाले सवारी पास वितरण रोक्न निर्देशन दिइएको छ ।
यस अघि नेपाल सरकार मन्त्रिपरिषदबाट विभिन्न मितिमा भएका निर्णय तथा गृह मन्त्रालयबाट भएको निर्देशनको आधारमा र विभिन्न वहानामा जिल्ला प्रशासन कार्यालयहरुले अन्तरजिल्ला गन्तब्यका लागि सवारी पास बितरण गर्दै आएका थिए । प्रशासनले यसरी बितरण गर्ने सवारी पास दुरुपयोग भएको भन्दै आलोचना समेत हुने गरेको थियो ।
