भैरहवा, २७ असार
होटल तथा रेष्टुरेन्टहरुमा तामझामा साथ मनाईने जन्म दिन आजभोलि बृद्धाश्रम, अनाथश्रमहरुमा मनाउने चलन शुरु भएको छ । उक्त क्रियाकलापले युवा पुस्तामा सामाजिक भावना बढ्दै गएको पनि पुष्टि भएको छ ।
यसैबीच शनिबार रुपन्देहीको एक सामुदायिक विद्यालयको शिक्षिका रहेकी तिर्था अर्यालले सत्यसाई बृद्धा सेवा आश्रम भैरहवामा आश्रय लिएर बसेका बृद्धा बुबाआमाहरुसंगै आफ्नो जन्म दिन मनाएकी छन् ।
उहाँले आश्रममा रहेका १६ जना बुबा आमासंगै केक काटेर उनीहरुलाई खुवाउदैं र आर्शिबाद थाप्दै मनाएकी हुन् ।
उमेरले ९० टेकेका धनबहादुर माझी काठमाण्डौंदेखि भैरहवा आएको दुई बर्ष भयो । शनिबार भने उनी जन्म दिनको शुभकामनाका शब्दहरु उपहार दिदैं अर्यालले दिएको केक मिठो मानि मानि खाइरहेका थिए ।
माझी जस्तै गुल्मी शान्तिपुरकी ८४ बर्षिय गंगामामा पुन अर्यालको टाउको माथि हात राखेर आर्शिबाद दिदैं सधै आश्रममा आइरहनु भन्दै थिइन् ।
उमेरले ६६ बर्षदेखि ९० बर्ष सम्मका बुबा आमाहरुले जन्म दिन मनाउन केक बोकेर आश्रम पुगेका युवायुवतिलाई फेरि फेरि पनि आश्रममा आइरहनु है नानी बाबु भनिरहेका थिए । उनीहरुमा मुहारमा खुसीको बहार छाएको प्रष्टै देखिन्थ्यो ।
१० जना आमा र ६ जना बुबाहरुलाई एकाबिहानै खुसी बनाउने काम भने सामुदायिक विद्यालयको शिक्षिका समेत रहेकी भैरहवामा बसोबास गर्ने अर्यालले गरेकी हुन् ।आज म जन्मिएको दिन आफुले जन्म दिएका सन्तती भन्दा केहि टाढिएर बृद्धासेवा आश्रममा बसेका बुबाआमासंगै केक काट्न पाउदा अत्यन्तै खुसी भएकी छु । खासमा यो दिन मेरो लागि स्मरणीय हुनेछ । ’
अर्यालले विहानै आफुसंगै बस्ने आमासंग आर्शिबाद लिएपछि यहां आश्रममा बसोबास गरेका बुबाआमासंग आर्शिवाद लिन आएको समेत बताईन् ।
बृद्धासेवा आश्रममा जन्म दिन मनाउने कार्यले आफुहरुलाई पनि प्रेरणा प्रदान गरेको अर्यालको साथि समेत रहेका सिद्धार्थनगर वडा नम्बर १२ का वडा सदस्य सरोज ठकुरीले बताउनु भयो ।
अर्यालले बृद्धा बुबाआमालाई केहि दिनलाई पुग्ने नास्ताहरु पनि दिएको आश्रमको सन्चालक समिती अध्यक्ष माया खरालले बताउनु भयो ।
२०५९ सालमा स्थापना भएको उक्त आश्रममा काठमान्डौका ४ जना, भैरहवाका ५ जना , स्यांग्जा, पाल्पा, प्यूठान, अर्घाखाचि र मणिग्रामका एक एक जना बुबा आमा बस्दै आएका छन् ।
