पूर्वी नवलपरासीमा कोरोना भाइरस संक्रमितको संख्या २ सय १० पुग्यो

रामकुमार श्रेष्ठ

नवलपरासी, १२ असार । पूर्वी नवलपरासीमा कोरोना भाइरस (कोभिड–१९) बाट ंक्रमित हुनेको संख्या २ सय १० पुगेको छ ।
जिल्ला स्वास्थ्य कार्यालय नवलपुरका प्रमुख केशव चापागाईका अनुसार विहीबार राति पुष्टि भएका कावासोती नगरपालिकाका १४ जना र गैडाकोट नगरपालिकाका ७ जना थपिएसँगै नवलपुरमा संक्रमितको संख्या २ सय १० जना पुगेको हो ।
कावासोती नगरपालिकाले संकलन गरेर पठाएको ६६ जनाको स्वाबको पिसिआर रिपोर्ट मध्ये १४ जनामा संक्रमण पुष्टि भएको हो । गण्डकी प्रदेशको स्वास्थ्य निर्देशनालयले पनि शुक्रबार विहान विज्ञप्ति जारी गर्दै नवलपुरमा २१ जना थपिएको पुष्टि गरेको छ ।

भरतपुर अस्पतालले दिएको जानकारी अनुसार कावासोती नगरपालिकाका २ महिला र १२ जना पुरुष गरी १४ जनामा कोरोना भाइरस पुष्टि भएको हो ।
कावासोती नगरपालिकाकी ३७ र २५ बर्षीया दुई महिला, २४, २४, ३०, ३५, २२, १८, २९, ५८ र १८ बर्षीय १२ जना पुरुषमा संक्रमण देखिएको भरतपुर अस्पतालले जनाकारी दिएको छ । यो सहित कावासोती नगरपालिकामा संक्रमितको संख्या ३० पुगेको छ ।
त्यसैगरी पूर्वीे नवलपरासीको गैडाकोट नगरपालिकामा विहीबार राति ७ जना नयाँ संक्रमित थपिएका छन् । गैडाकोट नगरपालिकाका १८ जनाको संकलित स्वाबको पिसिआर परीक्षण गर्दा विहीबार ७ जना पुरुषमा कोरोना भाइरस संक्रमण पोजेटिभ देखिएको भरतपुर अस्पतालले जनाएको छ ।
गैडाकोट नगरपालिकाका ५३, ३४, २३, २५, ५२, ५२ र २५ बर्षीय गरी ७ जना पुरुषमा संक्रमण देखिएको हो । यो सहित गैडाकोट नगरपालिकामा संक्रमितको संख्या १८ पुगेको छ ।
त्यसैगरी बिहीबार दिउँसो विनयीत्रिवेणीमा १ जना महिला र ४ जना पुरुषमा संक्रमण देखिएको थियो । पूर्वी नवलपरासीमा अहिलेसम्म गैडाकोट नगरपालिकामा १८, कावासोती नगरपालिकामा ३०, देवचुली नगरपालिकामा ९, मध्यविन्दु नगरपालिकामा ४२ जना संक्रमित पुगेका छन् ।
त्यसैगरी विनयीत्रिवेणी गाउँपालिकामा १८, हुप्सेकोट गाउँपालिकामा ३२, बुलिङटार गाउँपालिकामा २७ र बौदीकाली गाउँपालिकामा ३४ जना संक्रमित छन् ।