भैरहवा, ११ असार ।
रुपन्देहीको सिद्धार्थनगर नगरपालिकाले आर्थिक वर्ष २०७७ ।०७८ का लागि ९५ करोड ९ लाखको बजेट ल्याएको छ । बुधबार भैरहवामा आयोजित सातौं नगरसभामा सिद्धार्थनगरपालिकाकी उपप्रमुख उमा काफ्लेले ९५ करोड ९ लाख ६६ हजार बराबरको बजेट प्रस्तुत गर्नु भएको हो । यो बजेट चालु आर्थिक वर्षको अनुमानित बजेट भन्दा २३ करोड ३७ लाख ९८ हजारले कम हो ।
नगरपालिकाले संघ र प्रदेश सरकारबाट प्राप्त समानीकरण, सशर्त अनुदान, राजस्व बांडफांड, समपूरक अनुदान, विशेष अनुदान, दातृ निकायबाट प्राप्त रकम, आन्तरिक आय स्रोतबाट गरी बजेट ल्याएको उपप्रमुख काफ्लेले जानकारी दिइन् ।
बजेटमा आन्तरिक आयका स्रोतहरुबाट १६ करोड, राजस्व बांडफांडबाड १३ करोड ७४ लाख ७७ हजार, लागत सहभागिताबाट २० लाख, संघीय र प्रदेश सरकार, दातृ निकायबाट ५८ करोड ६ लाख १५ हजार र अन्य स्रोतबाट परिचालन गरिने नगरपालिकाले जनाएको छ ।
बजेट तथा कार्यक्रम प्रस्तुत गर्दै नगरप्रमुख काफ्लेले सामाजिक विकासतर्फ ३२, पूर्वाधार विकासतर्फ ३१, सुशासन तथा संस्थागत विकासतर्फ २६, आर्थिक विकासतर्फ ७ र वातावरण तथा विपद् व्यवस्थापनतर्फ ५ प्रतिशत खर्च हुने अनुमान गरिएको बताउनु भयो । त्यस्तै चालुतर्फ कुल बजेटको ५८ प्रतिशत र पुंजीगततर्फ ४२ प्रतिशत खर्च हुने नगरपालिकाले अनुमान गरेको छ ।
नगरपालिकाले वडा तहको शिक्षा, स्वास्थ्य लगायतको सामाजिक विकास, आर्थिक विकास, पूर्वाधार विकास र अन्यका लागि प्रतिवडा न्यूनतम ४० लाख र जनसंख्या, भूगोल र वडागत विकासको अवस्थाको आधारमा जम्मा ८ करोड २० लाख विनियोजन गरिएको उपप्रमुख काफ्लेले बताउनु भयो ।
नगरपालिकाले आ.व. २०७७र७८ मा शिक्षा, स्वास्थ्य, कृषि, पूर्वाधार र समावेशी विकासमार्फत सामाजिक न्यायसहितको विकास जोड दिने र वित्तीय स्रोत परिचालन र व्यवस्थापनमा नीजि क्षेत्र र नगरवासीको सहभागिता, सहकार्यलाई बढाउँदै लैजाने उनले बताउनु भयो । त्यसै गरी नगरपालिकाले स्वास्थ्य जोखिम संवेदनशीलतालाई ध्यानमा राखी विपद्को उचित व्यवस्थापन गर्ने र उपलब्ध स्रोतसाधन नगरका प्राथमिकताका क्षेत्रमा लगानी गर्ने उनले बताइन् । नगरपालिकाले सुरक्षित आवास निर्माण कार्यक्रम (मेयर आवास), सुरक्षित मातृत्व प्रवद्र्धन कार्यक्रम, घरघरमा कौशी खेती र करेसावारी, भान्सा भान्सामा अर्गानिक ताजा तरकारी, राष्ट्रका लागि खेलकुद र स्वास्थ्यका लागि खेलकुद अन्तर्गत महात्मा गोल्ड कप, मेयर कप क्रिकेट, उपप्रमुख महिला कप लगायतका कार्यक्रमहरु पनि अघि सारेको छ ।
“पर्यटन, उद्योग, व्यापार र शिक्षा, हराभरा बुद्धभुमि सिद्धार्थनगरको इच्छा” नगरपालिकाको दीर्घकालिन सोचलाई आत्मसात् गर्दै नगरको समग्र विकास गर्नेतर्फ केन्द्रीत भइ वार्षिक बजेट निर्माण गरिएको नगरप्रमुख उमा काफ्लेको भनाइ छ । यस अघि नगरपालिकाका प्रमुख हरि प्रसाद अधिकारीद्वारा प्रस्तुत गरिएको आ.व. २०७७र७८ को नीति तथा कार्यक्रम असार ५ गते नै पारित भइसकेको छ ।
