बुटवल, ३० असार । मणिमुकुन्द सेन उद्यान संरक्षण समिति (फुलबारी) को १२ औं साधारणसभा तथा चौथो अधिवेशनले कार्यसम्पादन समिति अध्यक्षमा खेमप्रसाद लुइँटेललाई पुनः निर्वाचित गरेको छ ।
सोमबार भएको साधारणसभा तथा अधिवेशनले लुइँटेलको अध्यक्षतामा निर्विरोध नयाँ नेतृत्व चयन गरेको हो । अधिबेशनबाट उद्यानको उपाध्यक्षमा बाबुराम पोखरेल र माधव नेपाल, महासचिवमा रमेशप्रसाद नेपाल, सचिवमा महेन्द्रप्रसाद लिगल र कोषाध्यक्षमा माधवप्रसाद श्रेष्ठ चयन हुनुभएको छ ।
त्यस्तैगरी खुला सदस्यमा गौतमलाल शाक्य, राजुप्रसाद लिगल, महिला सदस्यमा भगवती बस्याल र सीता खनाल चयन हुनुभएको छ । जनजाति सदस्यमा मिलेन्द्र श्रेष्ठ, उत्पीडित सदस्यमा जोगलाल विश्वकर्मा, लेखा समिति संयोजकमा लोकराज शर्मा र सदस्यमा लिलबहादुर विश्वकर्मा चयन भएको निर्वाचन समितिले जनाएको छ । लेखा सदस्य दुई जना चयन गर्नुपर्नेमा उम्मेदवारी फिर्ता भएकाले एक जना मात्र निर्विरोध भएको र थप एक जना कार्यसम्पादन समितिको प्रथम बैठकले टुंग्याउने गरी निर्वाचन प्रक्रिया सकिएको निर्वाचन समितिले जनाएको छ । फूलबारीको विधानमा दुई जना सदस्य अध्यक्षले मनोनयन गर्ने प्रावधान छ ।
सोमबार साधारणसभाको उदघाटन गर्दै प्रदेश नम्बर पाँचका सामाजिक विकास मन्त्री सुदर्शन बरालले फुलबारीको विकासका लागि प्रदेश सरकार सधै सहकार्य गर्न तयार रहेको बताउनुभयो । उद्यानमा जीर्ण अवस्थामा रहेको मणिमुकुन्द सेन राजाको दरबारको संरक्षण गर्न प्रदेश सरकारले सक्दो सहयोग गर्ने प्रतिबद्धता व्यक्त गर्दै मन्त्री बरालले प्रदेशभित्र रहेका यस्ता पार्कहरुले पर्यटन विकासमा ठूलो टेवा पु¥याउने बताउनुभयो ।
उद्यानका अध्यक्ष खेमप्रसाद लुइँटेलले उद्यानको गुरुयोजना तयार गरिएको जानकारी दिँदै आगामी दिनमा सोही अनुसार भौतिक निर्माण तथा पार्कहरुको सौन्दर्यकरणका कामहरु अगाडि बढाइने बताउनुभयो ।
