अर्घाखाँची, ३ असार । अर्घाखाँचीमा आरडीटी रिपोर्ट पोजेटिभ आएका एक पुरुषले आत्महत्या गरेका छन् । जिल्लाको शितगंगा नगरपालिका –५ जुकेनास्थित हरि माविको क्वारेन्टाइनमा बसेका ४४ वर्षिय देबबहादुर विकले गएराति आत्महत्या गरेका हुन् ।
विद्यालयको एउटा कोठामा संगै बसेका तीनजना मध्ये दुईजना साथीहरु निदाएपछि विकले रातको समयमा आत्महत्या गरेका वडा अध्यक्ष कमल पौडेलले जानकारी गराउनु भयो । विकको २४ गते आरडीटी परीक्षणमा रिपोर्ट पोजेटिभ आएको थियो । आरडीटी परीक्षणमा रिपोर्ट पोजेटिभ आएपछि पीसीआर परीक्षणका लागि २५ गते विकको स्वाबको नमुना संकलन गरेर रुपन्देहीको भैरहवा स्थित प्रादेशिक प्रयोगशालामा पठाइएको थियो । २५ दिन अघि भारतको पञ्जाबबाट आएर विक क्वारेन्टाइनमा बसेका थिए । उक्त क्वारेन्टाइनमा २५ जना रहेका छन् ।
प्रयोगशालाले पीसीआर परीक्षण र रिपोर्ट दिन ज्यादै ढिलाई गर्दा यस्ता दुःखद् घटनाहरु घट्न थालेको अर्घाखाँचीका प्रमुख जिल्ला अधिकारी बिजयराज पौडेलले प्रतिक्रिया दिनुभयो । उहांका अनुसार समयमा रिपोर्ट नआउंदा मान्छेहरुमा नैराशयता र नकारात्मक कुराहरु आउने समस्या भएको छ ।
