बुटवल, १४ बैशाख । नेपाल आयल निगम ५ नम्वर प्रादेशिक कार्यालय भलवारी रुपन्देहीले विश्वब्यापी रुपमा फैलिरहेको कोरोना भाइरस (कोभिड–१९)को उच्च जोखिम बाट बच्न र यसको संक्रमण फैलिन नदिन स्यानिटाइजिङ गेट र अटोमेटिक (स्वचालित ) स्यानिटाइजिङ टनेल निर्माण गरेको छ । कोरोना भाइरसको महामारीवाट समस्त विश्व आक्रान्त बनिरहेको अवस्थामा यसको जोखिमवाट बच्न र संक्रमण फैलिन नदिन निगमको ५ नं. प्रादेशिक कार्यालयले नेपालमै नमुनाका रुपमा अटोमेटिक स्यानिटाइजिङ गेट र टनेल निर्माण गरेको हो ।
‘विश्वब्यापी रुपमा कोरोना भाइरसको महामारी बढिरहेको अवस्थामा यसको जोखिमबाट बच्न र संक्रमण फैलिन नदिन हामीले निगम परिसरमा अटोमेटिक स्यानिटाइजिङ गेट र टनेल निर्माण गरेका हौं ।’ निगमका प्रादेशिक प्रमुख इन्जिनियर सूरज शाहले भन्नुभयो–‘मुलुकभर लकडाउन भएपनि छिमेकी मुलुक भारतवाट नियमित रुपमा इन्धन ढुवानी गरिराखेको निगमको ५ नं. प्रादेशिक कार्यालयले कोरोना भाइरसको संक्रमणलाई न्यूनिकरण गर्ने उद्देश्यले स्यानिटाइजिङ गेट र टनेल टनेल निर्माण गरेको हो ।’
छिमेकी मुलुक भारतमा कोरोना भाइरसको जोखिम उच्च रहेको र टैंक÷ट्रकहरुबाट समेत कोरोना भाइरसको संक्रमण फैलिन सक्ने अवस्थालाई मध्येनजर गरी निगमले इण्डियन आयल कर्पोरेशनबाट पेट्रोलियम पदार्थ बोकेर आउने टैंक÷ट्रकहरुलाई स्यानिटाइजिङ गर्ने उद्देश्यले स्यानिटाइजिङ टनेल निर्माण गरिएको निगमका प्रवन्धक शैलेन्द्र भुसालले जानकारी गराउनु भयो । निगमले निगम परिसर भित्र प्रवेश गर्ने टैंक÷ट्रकहरुका साथै कामका लागि आउने मानिसहरुलाई स्यानिटाइज गर्न सेन्सरयुक्त स्यानिटाइजिङ टनेल निर्माण गरेको प्रवन्धक भुसालले बताउनु भयो ।
टैंक÷ट्रक स्यानिटाइज गर्न निर्माण गरिएको साढे चार मिटर उचाई र सात मिटर चौडा टनेलमा ११ ओटा नोजलबाट निगम भित्र प्रबेश गर्ने टैंक÷ट्रकहरुलाइ अटोमेटिक स्यानिटाइजिङ गर्ने विशेषता रहेको छ । एउटा गाडीलाई करिव १० सेकेण्ड स्यानिटाइजिङ गर्न एक हजार लिटर क्षमताको ट्याँकीमा सोडियम हाईपोक्लोराइड सोलुशन नामक तरल पदार्थ राखिएको छ ।
यस्तै निगममा आउने चालक, सहचालक, कर्मचारी लगायत अन्य आगन्तुकहरुलाई स्यानिटाइज गर्न अलग्गै अटोमेटिक स्यानिटाइजिङ टनेल निर्माण गरिएको निगमका लेखा प्रमुख रमेश ज्ञवालीले जानकारी दिनुभयो । चार वाटा नोजल सहितको सेन्सरयुक्त टनेलमा जो कोही मानिस निगम परिसर भित्र प्रबेश गर्दा चार सेकेण्ड सम्म स्यानिटाइजिङ गर्ने विशेषता रहेको छ । यसका लागि पनि एक हजार लिटर क्षमताको ट्याङ्कीमा स्यानिटाइजिङ गर्ने तरल पदार्थ राखिएको छ ।
निगम परिसरमा अटोमेटिक स्यानिटाइजिङ टनेल निर्माण संगै कोरोना भाइरसको संक्रमण न्युनिकरणमा टेवा पुग्ने र निगममा आउने मानिस र सवारी साधनका चालकले समेत आफु सुरक्षित रहेको महशुस गर्ने विश्वास गरिएको निगमका प्रमुख इन्जिनियर शाहले वताउनु भयो ।
