नवलपरासी, २५ असार । नवलपरासी र ओखलढुङ्गमा भएका अलग अलग दुर्घटनामा चार जनाको मृत्यु भएको छ ।
नवलपरासीको मध्यविन्दु नगरपालिका १० दुम्कीबास अरुणखोलाबीच जंगलमा मंगलवारराति भएको सवारी दुर्घटनामा एक जना सशस्त्र प्रहरी जवानको मृत्यु भएको छ ।
प्रहरी चौकी अरुणखोलाका अनुसार राती जंगलमा रोकिराखेको ना ६ ख ५२०७ नम्बरको ट्रकसँग लु २२ प २८९९ नम्बरको मोटरसाइकल ठक्कर खाँदा मोटरसाइकल चालक पाल्पाको तिनाउ गाउँपालिका १ बस्ने २७ बर्षका भीमबहादुर छहरी मगरको मृत्यु भएको हो ।
यस्तै ओखलढुंगामा यात्रु बस दुर्घटना हुँदा तीन जनाको मृत्यु भएको छ भने १६ जना घाइते भएका छन् । काँकडभिट्टाबाट सोलुखुम्बुतर्फ जाँदै गरेको मे १ ख १८९१ नम्बरको बस बुधबार बिहान ३ बजेतिर सिद्धिचरण राजमार्गअन्तर्गत मानेभञ्ज्याङ गाउँपालिका–६ डढुवामा दुर्घटना भएको हो । मृत्यु हुनेहरुमा बसका चालक झपाका ४५ वर्षीय कृष्णबहादुर बस्नेत, दूधकुण्ड नगरपालिका–५ सोलुका ५२ वर्षीया माया थापा र सिन्धुली कमलामाइ नगरपालिकाकी अन्दाजी ३० वर्षीय लालबहादुर धामी रहेको प्रहरीले जनाएको छ । प्रहरीका अनुसार गाडीमा सवार १६ जना घाइते भएका छन् ।
