बुटवल, १ असोज । आज असोज १ गते अर्थात विश्वकर्मा पूजा । देशभरका उद्योग कलकारखानाका मेसिन तथा फलामको पुजा गरी मनाईदै छ ।
विशेष गरी धातुबाट बनेका उपकरण चलाउने मजदुरहरुले आजको दिन धुमधामसंग पुजाआजा गरी मनाउने गर्दछन् ।
आज सवारी साधन मेसिनहरुको पुजा गरिनुका साथै उद्योगहरु खुल्ला राखेर सवैलाई भ्रमण र प्रसाद ग्रहण गराउने चलन छ । विश्वकर्मा पूजामा वर्षभरि कुनै अप्रिय घटना नहोस् भनेर मेसिनको पूजा गर्ने चलन छ ।
आज कलकारखानामा रंगीचंगी पार्नुका साथै बिशेष पूजा पनि गरिन्छ । सवारी साधन हुनेहरूले बिहानै सवारी साधनलाई धोएर पूजाआजा गर्ने गर्दछन् । बिहानै गुड्ने सार्वजनिक सवारीका साधनलाई पनि बिहानै धोएर सफा पारी रिवन तथा विभिन्न ध्वजापताका लगाएर रंगीन बनाएर पुजा गरिन्छ ।
बिषेश गरेर आज श्रम, शिल्प र साधनाका अधिष्ठाता देवता विश्वकर्माकर्माको पूजा गरिन्छ । यसैको प्रतिकस्वरुप धातु तथा धातुबाट बनेका यन्त्र उपकरणको सरसफाइ, मर्मतसम्भार र पुजाआजा गरिदैछ । उद्योगधन्दा, कलकारखाना, मोटर गाडी लगायतका उपकरण आज पुजाआजा गरेर मात्र संचालन गरिन्छ ।
पूजा गरिसकेपछि दिनभर ती सामानको प्रयोग नगर्ने चलन पनि छ । यस अवसरमा केहीले विश्वकर्माको मूर्ति बनाई पूजा गर्ने र प्रसाद चढाउने पनि गर्दछन् । आज पूजा गरिएको मूर्तिलाई भोलि बिहान नजिकैको खोला वा नदीमा लगि बिसर्जन गरेपछि विश्विकर्मा पूजा समापन हुन्छ ।
विश्वकर्मा पुजाकालागि आज बुटवलको सिद्धबाबा, नवलपरासीको दाउन्ने, दाङको मुसोट लगायतका क्षेत्रका मन्दिरमा सवारी साधनको पुजा गराउन यातायात ब्यवसायी तथा मजदुरहरुको बिषेश भिड लाग्ने गर्दछ । आजको दिनमा बिश्वकर्मालाई खुशि पार्न सकेमा बर्ष भरी फलिफाप हुने जनबिश्वास रही आएको छ ।
यो पूजा विशेष गरी मधेशी समुदायले धुमधाम र तामझामका साथ मनाउने गर्दछन् । फलामको क्षेत्रमा काम गर्ने मजदुरहरुलाइ आजका दिन बिदा पनि दिने चलन छ ।
